യങ് ഡെമോക്രാറ്റ്സ് വടകര അസംബ്ലി കമ്മിറ്റി നിലവിൽ വന്നു; യുവതയുടെ കരുത്ത് തെളിയിച്ച് അഴിയൂരിൽ സ്വീകരണ റാലി

വടകര: സോഷ്യൽ ഡെമോക്രാറ്റിക് പാർട്ടി ഓഫ് ഇന്ത്യയുടെ (എസ്.ഡി.പി.ഐ) യുവജന വിഭാഗമായ യങ് ഡെമോക്രാറ്റ്സിന്റെ വടകര അസംബ്ലി കമ്മിറ്റി നിലവിൽ വന്നു.

അഴിയൂരിൽ നടന്ന വടകര അസംബ്ലി യൂത്ത് കൗൺസിൽ പരിപാടിയിലാണ് പുതിയ കമ്മിറ്റിയെ പ്രഖ്യാപിച്ചത്.

പരിപാടി എസ്.ഡി.പി.ഐ വടകര നിയോജക മണ്ഡലം പ്രസിഡന്റ് ഷംസീർ ചോമ്പാല ഉദ്ഘാടനം ചെയ്തു. യങ് ഡെമോക്രാറ്റ്സ് കോഴിക്കോട് ജില്ലാ ഓർഗനൈസിംഗ് കമ്മിറ്റി അംഗം അൻസാർ യാസർ അധ്യക്ഷത വഹിച്ചു. യങ് ഡെമോക്രാറ്റ്സ് സംസ്ഥാന ജോയിന്റ് കൺവീനർ നഫീസത്തുൽ മിസിരിയ മുഖ്യപ്രഭാഷണം നടത്തി. പ്രോഗ്രാം കമ്മിറ്റി ചെയർമാൻ മൻസൂദ് എരിക്കിൽ സ്വാഗതം പറഞ്ഞു. യങ് ഡെമോക്രാറ്റ്സ് കോഴിക്കോട് ജില്ലാ ഓർഗനൈസിംഗ് കമ്മിറ്റി അംഗം റയീസ് കൂടാട്ട് പുതിയ ഭാരവാഹികളുടെ പ്രഖ്യാപനം നടത്തി.

യങ് ഡെമോക്രാറ്റ്സ് കോഴിക്കോട് ജില്ലാ ഓർഗനൈസിംഗ് കമ്മിറ്റി അംഗം സ്വർണ്ണ ശ്രീജിത്ത്, എസ്.ഡി.പി.ഐ മണ്ഡലം സെക്രട്ടറി ബഷീർ കെ.കെ, വിമൺ ഇന്ത്യ മൂവ്മെന്റ് വടകര മണ്ഡലം പ്രസിഡന്റ് അഫീറ ഷംസീർ, അഴിയൂർ ഗ്രാമപഞ്ചായത്ത് വാർഡ് മെമ്പർമാരായ റാജിഷ ഷെജീർ, സബാദ് വി.പി എന്നിവർ പുതിയ ഭാരവാഹികൾക്ക് അഭിവാദ്യമർപ്പിച്ച് സംസാരിച്ചു.

വടകര അസംബ്ലി കമ്മിറ്റി പ്രസിഡന്റായി മൻസൂദ് എരിക്കിൽ, വൈസ് പ്രസിഡന്റുമാരായി റമീസ് ബാബരി, അൻസാർ യാസർ, സെക്രട്ടറിയായി മുഹമ്മദ് ബിലാൽ, ജോയിന്റ് സെക്രട്ടറിമാരായി ഷഹാന ഷെരീഫ്, റാഷിദ് ഒഞ്ചിയം, ട്രഷററായി മുഹമ്മദ് സലാഹുദ്ദീൻ എന്നിവരെയും കമ്മിറ്റി അംഗങ്ങളായി ഹാഫിസ് പുതുപ്പണം, റാഫി എം.കെ, റനീഷ ഫായിസ് എന്നിവരെയും തിരഞ്ഞെടുത്തു.

തുടർന്ന് അഴിയൂർ ടൗണിൽ പുതിയ ഭാരവാഹികൾക്ക് അഭിവാദ്യമർപ്പിച്ച് ദഫ് മുട്ടിന്റെയും ഒപ്പനയുടെയും ബാൻഡ് വാദ്യങ്ങളുടെയും അകമ്പടിയോടെ അഞ്ഞൂറോളം പേർ പങ്കെടുത്ത വർണശബളമായ സ്വീകരണ റാലി നടന്നു. ആവേശകരമായ മുദ്രാവാക്യങ്ങളും യുവതയുടെ സാന്നിധ്യവും കൊണ്ട് ശ്രദ്ധേയമായ റാലി അക്ഷരാർത്ഥത്തിൽ കടത്തനാടൻ യുവതയുടെ കരുത്തും പോരാട്ടവീര്യവും വിളിച്ചോതുന്നതായി മാറി.