ചെങ്കടലിൽ ഇന്ത്യൻ ചരക്കുകപ്പലിന് നേരെ ആക്രമണം; കപ്പൽ മുങ്ങി, മലയാളികൾ അടക്കം 14 ജീവനക്കാർ സുരക്ഷിതർ

ദില്ലി: ചെങ്കടലിൽ യെമൻ തീരത്തിന് സമീപം ഇന്ത്യൻ ചരക്കുകപ്പലായ എം.എസ്.വി ഫൈസ് നൂറെ ഒലിയക്ക് നേരെ പ്രൊജക്റ്റൈൽ ആക്രമണം. ആക്രമണത്തിൽ തകരാറിലായ കപ്പൽ തലകീഴായി മറിഞ്ഞ് കടലിൽ മുങ്ങി. എന്നാൽ കപ്പലിലുണ്ടായിരുന്ന 13 ഇന്ത്യൻ പൗരന്മാരും ഒരു യെമൻ സ്വദേശിയും ഉൾപ്പെടെ 14 ജീവനക്കാരെയും യെമൻ കോസ്റ്റ് ഗാർഡ് സാഹസികമായി രക്ഷപ്പെടുത്തി. രക്ഷപ്പെടുത്തിയ ജീവനക്കാരെ യെമനിലെ മൊഖ തുറമുഖത്ത് എത്തിച്ചിട്ടുണ്ടെന്നും എല്ലാവരും പരിക്കുകളില്ലാതെ സുരക്ഷിതരാണെന്നും ഔദ്യോഗിക വൃത്തങ്ങൾ സ്ഥിരീകരിച്ചു.

കേന്ദ്ര സർക്കാരും വിദേശകാര്യ മന്ത്രാലയവും അപലപിച്ചു

ഇന്ത്യൻ കപ്പലിന് നേരെ നടന്ന പ്രകോപനമില്ലാത്ത ആക്രമണത്തെ കേന്ദ്ര തുറമുഖ-ഷിപ്പിംഗ് മന്ത്രി സർബാനന്ദ സോണോവാളും വിദേശകാര്യ മന്ത്രാലയവും ശക്തമായി അപലപിച്ചു. തങ്ങളുടെ പൗരന്മാരുടെ സുരക്ഷയ്ക്കാണ് പ്രഥമ പരിഗണനയെന്ന് മന്ത്രി വ്യക്തമാക്കി. മേഖലയിലെ ഇന്ത്യൻ നാവികരുടെയും കപ്പൽ ജീവനക്കാരുടെയും പൂർണ്ണ സുരക്ഷ ഉറപ്പാക്കാനും രക്ഷപ്പെട്ടവർക്ക് ആവശ്യമായ എല്ലാ സഹായങ്ങളും എത്തിക്കാനും ഡയറക്ടർ ജനറൽ ഓഫ് ഷിപ്പിംഗിന് കേന്ദ്രസർക്കാർ നിർദ്ദേശം നൽകി. ചെങ്കടലിലൂടെയുള്ള അന്താരാഷ്ട്ര കപ്പൽ ഗതാഗതത്തിന് നേരെ നിരന്തരം ഉണ്ടാകുന്ന ആക്രമണങ്ങളിൽ ഇന്ത്യ കടുത്ത ഉത്കണ്ഠ രേഖപ്പെടുത്തി.

നന്ദി അറിയിച്ച് ഇന്ത്യ; മേഖലയിൽ ആശങ്ക ശക്തം

റിയാദിലെ ഇന്ത്യൻ എംബസി സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണെന്നും യെമൻ അധികൃതരുമായി നിരന്തരം ആശയവിനിമയം നടത്തുന്നുണ്ടെന്നും വിദേശകാര്യ മന്ത്രാലയം അറിയിച്ചു. ജീവനക്കാരുടെ ജീവൻ വേഗത്തിൽ രക്ഷപ്പെടുത്തിയ യെമൻ ഭരണകൂടത്തിനും കോസ്റ്റ് ഗാർഡിനും ഇന്ത്യ ഔദ്യോഗികമായി നന്ദി അറിയിച്ചു. മേഖലയിൽ സംഘർഷ അന്തരീക്ഷം നിലനിൽക്കുന്നതിനിടെ ഹൊർമുസ് കടലിടുക്കിന് സമീപം മറ്റൊരു ലൈബീരിയൻ ചരക്കപ്പലിന് നേരെയും സമാനമായ ആക്രമണം നടന്നിരുന്നു. അന്താരാഷ്ട്ര നാവിക പാതകളിൽ തുടർച്ചയായി ഉണ്ടാകുന്ന ഇത്തരം ആക്രമണങ്ങൾ ആഗോള തലത്തിൽ വലിയ ആശങ്ക സൃഷ്ടിച്ചിട്ടുണ്ട്.