എക്സ്ട്രാ ടൈം ആവേശപ്പോരാട്ടം നോർവെയെ തകർത്ത് ഇംഗ്ലണ്ട് സെമിയിൽ; രക്ഷകനായി വീണ്ടും ബെല്ലിങ്ഹാം,

മിയാമി: ഫിഫ ലോകകപ്പിലെ ആവേശകരമായ ക്വാർട്ടർ ഫൈനൽ പോരാട്ടത്തിൽ നോർവെയെ വീഴ്ത്തി മുൻ ചാമ്പ്യന്മാരായ ഇംഗ്ലണ്ട് സെമിഫൈനലിൽ പ്രവേശിച്ചു. മിയാമിയിൽ നടന്ന മത്സരത്തിൽ ഒരു ഗോളിന് പിന്നിൽ നിന്ന ശേഷമാണ് രണ്ട് ഗോളുകൾ തിരിച്ചടിച്ച് ഇംഗ്ലീഷ് പട സെമി ടിക്കറ്റുറപ്പിച്ചത്. വ്യാഴാഴ്ച നടക്കാനിരിക്കുന്ന സെമിഫൈനലിൽ അർജന്റീന – സ്വിറ്റ്സർലൻഡ് മത്സരത്തിലെ വിജയികളെയാകും ഇംഗ്ലണ്ട് നേരിടുക.

നിശ്ചിത സമയത്ത് ഇരുടീമുകളും ഒരോ ഗോൾ വീതം അടിച്ച് സമനില പാലിച്ചതിനെ തുടർന്ന് മത്സരം എക്സ്ട്രാ ടൈമിലേക്ക് നീളുകയായിരുന്നു. കളിയുടെ 93-ാം മിനിറ്റിൽ റയൽ മാഡ്രിഡിന്റെ സൂപ്പർ താരം ജൂഡ് ബെല്ലിങ്ഹാമാണ് ഇംഗ്ലണ്ടിന്റെ വിജയമുറപ്പിച്ച നിർണ്ണായക ഗോൾ നേടിയത്. പകരക്കാരനായി കളത്തിലിറങ്ങിയ മോർഗൻ റോജേഴ്‌സ് ഉതിർത്ത വെടിയുണ്ട പോലെയുള്ള ഷോട്ട് നോർവീജിയൻ ഗോളി നൈലാൻഡ് തടുത്തെങ്കിലും പന്ത് കൈപ്പിടിയിലൊതുക്കാൻ കഴിഞ്ഞില്ല. റീബൗണ്ട് ചെയ്ത് മുന്നിലേക്ക് വീണ പന്ത് അതിവേഗത്തിൽ കുതിച്ചെത്തിയ ബെല്ലിങ്ഹാം നോർവേയുടെ വലയിലേക്ക് അടിച്ചുകയറ്റുകയായിരുന്നു.

ഇഞ്ചോടിഞ്ച് പോരാട്ടം; വാശിയേറിയ നിമിഷങ്ങൾ

മത്സരത്തിന്റെ തുടക്കത്തിൽ ആക്രമിച്ചു കളിച്ച നോർവെയാണ് ആദ്യം ലീഡെടുത്തത്. കളിയുടെ 36-ാം മിനിറ്റിൽ ഇടതു വിങ്ങിലൂടെ പന്തുമായി കുതിച്ചുകയറിയ ആൻഡ്രിയാസ് ഷ്ജെൽഡെറപ്പാണ് ഇംഗ്ലീഷ് പ്രതിരോധത്തെ കാഴ്ചക്കാരാക്കി നോർവെയ്ക്ക് അക്കൗണ്ട് തുറന്നു നൽകിയത്.

എന്നാൽ ആദ്യ പകുതിയുടെ ഇഞ്ചുറി ടൈമിൽ ഇംഗ്ലണ്ട് ഇതിന് മറുപടി നൽകി. ഇടതു വിങ്ങിലൂടെ മുന്നേറിയ ആന്റണി ഗോർഡൻ നൽകിയ പാസ്സ് സ്വീകരിച്ച് ജൂഡ് ബെല്ലിങ്ഹാം മനോഹരമായൊരു ഫിനിഷിംഗിലൂടെ ഇംഗ്ലണ്ടിന് സമനില സമ്മാനിച്ചു. തൊട്ടുപിന്നാലെ സൂപ്പർ താരം ഹാരി കെയ്ൻ നോർവേ വല കുലുക്കിയെങ്കിലും റഫറി ഓഫ് സൈഡ് വിളിക്കുകയായിരുന്നു.

രണ്ടാം പകുതിയുടെ തുടക്കത്തിൽ ഹെഗ്ഗെമിലൂടെ നോർവെ വീണ്ടും സ്കോർ ചെയ്തെങ്കിലും കോർണർ കിക്കിനിടയിലെ കൂട്ടപ്പൊരിച്ചിലിൽ സ്റ്റാർ സ്ട്രൈക്കർ എർലിങ് ഹാലണ്ട് ഇംഗ്ലീഷ് താരത്തെ ഫൗൾ ചെയ്തത് വി.എ.ആർ (VAR) പരിശോധനയിൽ തെളിഞ്ഞതോടെ ആ ഗോൾ റദ്ദാക്കപ്പെട്ടു. ഒടുവിൽ എക്സ്ട്രാ ടൈമിലെ ബെല്ലിങ്ഹാമിന്റെ ഇരട്ട ഗോൾ മികവിൽ ഇംഗ്ലണ്ട് കളം വിടുകയായിരുന്നു.