ചീഫ് ജസ്റ്റിസിന്റെ പരാമർശത്തിനെതിരെ പ്രതിഷേധം; ഇൻസ്റ്റഗ്രാമിൽ തരംഗമായി 'കോക്രോച്ച് ജനതാ പാർട്ടി', ഫോളോവേഴ്‌സ് ഒരു കോടി കടന്നു

ന്യൂഡൽഹി: സുപ്രീം കോടതി ചീഫ് ജസ്റ്റിസ് സൂര്യകാന്ത് യുവാക്കളെ പാറ്റകളോട് (Cockroaches) ഉപമിച്ചതിനെതിരെ രാജ്യവ്യാപകമായി ഉയർന്ന പ്രതിഷേധം പുതിയൊരു സോഷ്യൽ മീഡിയ തരംഗത്തിന് വഴിമാറുന്നു. ചീഫ് ജസ്റ്റിസിന്റെ പരാമർശത്തിൽ പ്രതിഷേധിച്ച് രൂപീകൃതമായ 'കോക്രോച്ച് ജനതാ പാർട്ടി' (CJP) എന്ന ആക്ഷേപഹാസ്യ രാഷ്ട്രീയ മുന്നണിയാണ് ഇപ്പോൾ സോഷ്യൽ മീഡിയയിൽ തരംഗം സൃഷ്ടിക്കുന്നത്. സ്വയം പ്രഖ്യാപിത രാഷ്ട്രീയ നിരീക്ഷകനായ അഭിജീത് ദീപ്കെ ആരംഭിച്ച ഈ പാർട്ടിയുടെ ഔദ്യോഗിക ഇൻസ്റ്റഗ്രാം അക്കൗണ്ട് ഫോളോ ചെയ്യുന്നവരുടെ എണ്ണം ചുരുങ്ങിയ ദിവസങ്ങൾക്കുള്ളിൽ ഒരു കോടി (10 Million) കടന്നു.

ചുരുങ്ങിയ പോസ്റ്റുകൾ, വൻ ജനപ്രീതി; വെബ്‌സൈറ്റും സജീവം

ഇതുവരെ ചിത്രങ്ങളും വീഡിയോകളും ഉൾപ്പെടെ വെറും അമ്പതോളം പോസ്റ്റുകൾ മാത്രമാണ് ഈ പേജിൽ പങ്കുവെച്ചിട്ടുള്ളത്. എങ്കിലും യുവാക്കൾക്കിടയിൽ ഇതിനോടകം തന്നെ വലിയ സ്വീകാര്യതയാണ് മുന്നണിക്ക് ലഭിച്ചിരിക്കുന്നത്. "യുവാക്കൾക്ക് വേണ്ടി യുവാക്കൾ തെരഞ്ഞെടുത്ത യുവാക്കളുടെ രാഷ്ട്രീയ മുന്നണി" എന്നാണ് പാർട്ടിയുടെ ഇൻസ്റ്റഗ്രാം ബയോയിൽ കുറിച്ചിരിക്കുന്നത്. സോഷ്യൽ മീഡിയ പേജുകൾക്ക് പുറമെ 'കോക്രോച്ച് ജനതാ പാർട്ടി'ക്കായി പ്രത്യേക വെബ്‌സൈറ്റും സജ്ജീകരിച്ചിട്ടുണ്ട്. ഈ വെബ്‌സൈറ്റ് വഴി താല്പര്യമുള്ള ഏതൊരു വ്യക്തിക്കും പാർട്ടിയിൽ അംഗത്വമെടുക്കാവുന്നതാണ്.

വൻപൻമാരും 'പാറ്റ പാർട്ടിയിൽ'; പ്രമുഖർ അംഗത്വം എടുത്തു

രാഷ്ട്രീയ-സിനിമ-സാംസ്കാരിക രംഗത്തെ നിരവധി പ്രമുഖരാണ് ചീഫ് ജസ്റ്റിസിന്റെ പരാമർശത്തോടുള്ള പ്രതിഷേധമെന്നോണം ഇതിനോടകം ഈ ആക്ഷേപഹാസ്യ മുന്നണിയിൽ അംഗത്വമെടുത്തിരിക്കുന്നത്.

മഹുവ മൊയ്ത്ര, കീർത്തി ആസാദ് (തൃണമൂൽ കോൺഗ്രസ് നേതാക്കൾ)

അനുരാഗ് കശ്യപ് (ചലച്ചിത്ര സംവിധായകൻ)

കൊങ്കണ സെൻ ശർമ്മ, ഇഷ ഗുപ്ത, ഫാത്തിമ സന ഷെയ്ഖ് (ബോളിവുഡ് താരങ്ങൾ)

കുനാൽ കമ്ര (പ്രമുഖ സ്റ്റാൻഡ്-അപ്പ് കൊമേഡിയൻ)

തുടങ്ങിയ പ്രമുഖർ ഇതിനോടകം തന്നെ കോക്രോച്ച് ജനതാ പാർട്ടിയിൽ ഔദ്യോഗികമായി ചേർന്നിട്ടുണ്ട്. ചീഫ് ജസ്റ്റിസിന്റെ പരാമർശത്തിനെതിരെ യുവാക്കൾ ഡിജിറ്റൽ ഇടങ്ങളിൽ നടത്തുന്ന ഈ വേറിട്ട പ്രതിഷേധം വരും ദിവസങ്ങളിലും വലിയ ചർച്ചകൾക്ക് വഴിതുറക്കുമെന്നുറപ്പാണ്.