ചെന്നൈയിൽ യുവാവ് കൊല്ലപ്പെട്ട നിലയിൽ; സുഹൃത്തുക്കളായ രണ്ട് യുവതികൾ ഉൾപ്പെടെ മൂന്ന് പേർ പിടിയിൽ

ചെന്നൈ: പല്ലാവരത്ത് യുവാവിനെ കൊലപ്പെടുത്തിയ കേസിൽ രണ്ട് യുവതികളെയും ഒരു പ്രായപൂർത്തിയാകാത്ത ആൺകുട്ടിയെയും പോലീസ് അറസ്റ്റ് ചെയ്തു. തിരുശൂലം സ്വദേശിയും നിർമാണ തൊഴിലാളിയുമായ സെൽവകുമാർ ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് റീന, രചിത എന്നിവരെയും ഇവരുടെ സോഷ്യൽ മീഡിയ സുഹൃത്തായ പതിനേഴുകാരനെയുമാണ് പല്ലാവരം പോലീസ് പിടികൂടിയത്.

സംഭവത്തെക്കുറിച്ച് പോലീസ് പറയുന്നത്: സോഷ്യൽ മീഡിയ പ്ലാറ്റ്‌ഫോമുകളിൽ സജീവമായിരുന്ന റീനയും രചിതയും ഇൻസ്റ്റാഗ്രാം റീലുകളിലൂടെയും മറ്റും നിരവധി യുവാക്കളുമായി സൗഹൃദം സ്ഥാപിച്ചിരുന്നു. ഇത്തരത്തിൽ പരിചയപ്പെട്ട സെൽവകുമാറുമായി ഇവർ തർക്കത്തിലാവുകയും, ഇയാൾ യുവതികളെ ഭീഷണിപ്പെടുത്തുകയും ചെയ്തിരുന്നതായി പറയപ്പെടുന്നു. തുടർന്ന് സോഷ്യൽ മീഡിയ വഴി തന്നെ പരിചയപ്പെട്ട മറ്റ് സുഹൃത്തുക്കളുടെ സഹായത്തോടെ യുവതികൾ സെൽവകുമാറിനെ വകവരുത്തുകയായിരുന്നു.

തട്ടിപ്പും ആഡംബര ജീവിതവും: യുവതികൾ സോഷ്യൽ മീഡിയ വഴി പുരുഷന്മാരെ പരിചയപ്പെടുകയും പിന്നീട് അവരെ ഭീഷണിപ്പെടുത്തി പണം തട്ടുകയും ചെയ്തിരുന്നതായി പോലീസ് അന്വേഷണത്തിൽ വ്യക്തമായിട്ടുണ്ട്. ഇത്തരത്തിൽ ലഭിക്കുന്ന പണം ഉപയോഗിച്ച് ഇവർ ആഡംബര ജീവിതമാണ് നയിച്ചിരുന്നത്.

കൊലപാതകത്തിൽ നേരിട്ട് പങ്കെടുത്ത മറ്റ് മൂന്ന് പേർ കൂടി നിലവിൽ ഒളിവിലാണ്. ഇവർക്കായി പോലീസ് തിരച്ചിൽ ഊർജിതമാക്കി. പ്രതികൾക്കെതിരെ കൊലപാതകം ഉൾപ്പെടെയുള്ള വകുപ്പുകൾ ചുമത്തി കേസെടുത്തു.