പയ്യോളി ഇരിങ്ങലിൽ വൈദ്യുതി ലൈനിൽ കുരങ്ങൻ ചാടി; ട്രെയിൻ ഗതാഗതം തടസ്സപ്പെട്ടു, വന്ദേ ഭാരതും ഇന്റർസിറ്റിയും പിടിച്ചിട്ടു

​

പയ്യോളി: ഇരിങ്ങലിൽ റെയിൽവേ ലൈനിലെ വൈദ്യുതി കമ്പിയിൽ (TRD Line) കുരങ്ങൻ ചാടിയതിനെ തുടർന്ന് ട്രെയിൻ ഗതാഗതം തടസ്സപ്പെട്ടു. കുരങ്ങൻ ചാടിയതോടെ ട്രെയിനുകളിലേക്ക് വൈദ്യുതി എത്തിക്കുന്ന ലൈനുകൾ തമ്മിൽ പിണഞ്ഞുപോവുകയും വൈദ്യുതി ബന്ധം പൂർണ്ണമായി വേർപെടുകയുമായിരുന്നു. ഇന്ന് ഉച്ചതിരിഞ്ഞാണ് സംഭവം.

​അപകടത്തെ തുടർന്ന് കണ്ണൂർ - എറണാകുളം ഇന്റർസിറ്റി എക്‌സ്പ്രസ്സ്, തിരുവനന്തപുരം വന്ദേ ഭാരത് എക്‌സ്പ്രസ്സ് എന്നീ പ്രധാന ട്രെയിനുകൾ വടകരയ്ക്ക് സമീപം വഴിയിൽ പിടിച്ചിട്ടു.

​ദുരിതത്തിലായി യാത്രക്കാർ; ഇന്റർസിറ്റി ഒന്നര മണിക്കൂർ വൈകി

​വൈദ്യുതി ലൈനുകൾ പിണഞ്ഞതോടെ ട്രെയിനുകൾക്ക് മുന്നോട്ട് എടുക്കാൻ സാധിക്കാത്ത അവസ്ഥയായി. തുടർന്ന് റെയിൽവേയുടെ ടവർ കാറിൽ സാങ്കേതിക വിദഗ്ദ്ധരും ജീവനക്കാരും സ്ഥലത്തെത്തിയാണ് തകരാർ പരിഹരിക്കാനുള്ള ശ്രമങ്ങൾ ആരംഭിച്ചത്.

​ഏകദേശം ഒന്നര മണിക്കൂറോളം സമയമെടുത്ത് നടത്തിയ കഠിനശ്രമത്തിനൊടുവിലാണ് ലൈനിലെ തകരാറുകൾ പൂർണ്ണമായി പരിഹരിക്കാനായത്. തകരാർ മൂലം ഇന്റർസിറ്റി എക്‌സ്പ്രസ്സ് ഒന്നര മണിക്കൂറും, വന്ദേ ഭാരത് എക്‌സ്പ്രസ്സ് 25 മിനിറ്റും വൈകിയാണ് ഓടിയത്. ലൈനിലെ പ്രശ്നങ്ങൾ പരിഹരിച്ചതിന് ശേഷമാണ് ഈ റൂട്ടിൽ ട്രെയിൻ ഗതാഗതം പുനഃസ്ഥാപിച്ചത്.