ടിക് ടോക് തർക്കത്തെ തുടർന്ന് ഷാർജയിൽ മലയാളി കുത്തേറ്റു മരിച്ചു

ഷാർജ: പ്രമുഖ സോഷ്യൽ മീഡിയ പ്ലാറ്റ്‌ഫോമായ ടിക് ടോക്കിലെ (TikTok) തർക്കത്തെ തുടർന്ന് യുഎഇയിലെ ഷാർജയിൽ കുത്തേറ്റു മരിച്ച മലയാളി പ്രവാസിയുടെ മൃതദേഹം നാട്ടിലെത്തിക്കാനുള്ള നടപടികൾ പുരോഗമിക്കുന്നു. ദുബായിൽ ബേക്കറി ജീവനക്കാരനായ കേരള സ്വദേശി ഇസ്മായിൽ പൊന്നൻ ഇബ്രാഹിം കുട്ടി (40) ആണ് ദാരുണമായി കൊല്ലപ്പെട്ടത്. ടിക് ടോക്കിൽ ഏറെ സജീവമായിരുന്ന ഇസ്മായിൽ, തന്റെ ഔദ്യോഗിക രേഖകൾ പ്രകാരമുള്ള ജന്മദിനത്തിൽ തന്നെയാണ് മരണത്തിന് കീഴടങ്ങിയത് എന്നത് പ്രവാസി ലോകത്തെ കണ്ണീരിലാഴ്ത്തുന്ന യാദൃശ്ചികതയായി.

കഴിഞ്ഞ മെയ് 31 ഞായറാഴ്ച പുലർച്ചെ ഷാർജയിലെ അൽ നഹ്ദ മേഖലയിൽ വെച്ചാണ് ഇസ്മായിലിന് നേരെ ക്രൂരമായ ആക്രമണമുണ്ടായത്. ഗുരുതരമായി പരിക്കേറ്റ ഇദ്ദേഹത്തെ ഉടൻ തന്നെ അൽ ഖാസിമി ആശുപത്രിയിൽ പ്രവേശിപ്പിച്ചെങ്കിലും അന്നേദിവസം രാവിലെ 8.44-ഓടെ മരണപ്പെടുകയായിരുന്നു. മൂർച്ചയേറിയ ആയുധം കൊണ്ടുള്ള കുത്തേറ്റതിനെ തുടർന്നുണ്ടായ കടുത്ത രക്തസ്രാവമാണ് മരണകാരണമെന്ന് മെഡിക്കൽ റിപ്പോർട്ടിൽ വ്യക്തമാക്കുന്നു.

ഇസ്മായിലിന്റെ മൃതദേഹം യുഎഇയിലെ നിയമനടപടികൾ പൂർത്തിയാക്കിയ ശേഷം സംസ്കാര ചടങ്ങുകൾക്കായി ഉടൻ തന്നെ നാട്ടിലേക്ക് കൊണ്ടുപോകുമെന്ന് അദ്ദേഹത്തിന്റെ സഹോദരൻ സ്ഥിരീകരിച്ചു. സംഭവത്തിൽ പ്രതികളായവരെ കണ്ടെത്താൻ ഷാർജ പോലീസ് അന്വേഷണം ഊർജ്ജിതമാക്കിയിട്ടുണ്ട്

ടിക് ടോക്ക് ലൈവിനിടെ എതിരാളികളായ മറ്റ് ചില ടിക് ടോക്കര്‍മാരുമായി ഉണ്ടായ രൂക്ഷമായ വാക്കുതര്‍ക്കമാണ് ആക്രമണത്തില്‍ കലാശിച്ചതെന്ന് ഇസ്മായിലിനെ പിന്തുടരുന്നവര്‍ പറയുന്നു. ലൈവ് സെഷനിലെ വെല്ലുവിളികള്‍ക്കൊടുവില്‍ പ്രശ്‌നം നേരിട്ട് തീര്‍ക്കാന്‍ ഇരുവിഭാഗവും ഒത്തുകൂടുകയായിരുന്നു. ഒരു ഷോപ്പിംഗ് മാളിന് പുറത്തുവെച്ച് നടന്ന ഈ വാക്കേറ്റം പിന്നീട് വന്‍ തെരുവ് യുദ്ധമായി മാറുകയും, ഇതിനിടെ പ്രതികളിലൊരാള്‍ മൂര്‍ച്ചയേറിയ ആയുധം ഉപയോഗിച്ച് ഇസ്മായിലിനെ കുത്തുകയുമായിരുന്നു. ആക്രമണത്തില്‍ മറ്റൊരാള്‍ക്കും പരിക്കേറ്റിട്ടുണ്ട്. ഇയാള്‍ ചികിത്സയിലാണ്.