പശ്ചിമ ബംഗാളിൽ തെരഞ്ഞെടുപ്പ് ഫലത്തിന് പിന്നാലെ വ്യാപക അക്രമം;സംഘർഷങ്ങളിൽ ഇതുവരെ നാല് പേർ കൊല്ലപ്പെട്ടതായി റിപ്പോർട്ട്

  

കൊൽക്കത്ത: പശ്ചിമ ബംഗാൾ നിയമസഭാ തെരഞ്ഞെടുപ്പ് ഫലം പുറത്തുവന്നതിന് പിന്നാലെ സംസ്ഥാനത്തിന്റെ വിവിധ ഭാഗങ്ങളിൽ വ്യാപക അക്രമസംഭവങ്ങൾ തുടരുന്നു. വോട്ടെണ്ണലിന് ശേഷം ഉണ്ടായ സംഘർഷങ്ങളിൽ ഇതുവരെ നാല് പേർ കൊല്ലപ്പെട്ടതായി 'ദി ടെലഗ്രാഫ്' റിപ്പോർട്ട് ചെയ്യുന്നു. അക്രമങ്ങൾ തടയാൻ കർശന നടപടികൾ സ്വീകരിക്കാൻ ചീഫ് ഇലക്ഷൻ കമ്മീഷണർ നിർദേശം നൽകിയിട്ടുണ്ട്.

കൊൽക്കത്തയിലെ ന്യൂ മാർക്കറ്റ് മേഖലയിൽ ബിജെപി പ്രവർത്തകർ ബുൾഡോസർ ഉപയോഗിച്ച് തൃണമൂൽ കോൺഗ്രസ് ഓഫീസും സമീപത്തെ ചില വ്യാപാര സ്ഥാപനങ്ങളും തകർത്തതായി റിപ്പോർട്ടുകളുണ്ട്. ഇതിന്റെ പശ്ചാത്തലത്തിൽ, നഗരത്തിൽ ജെസിബികളോ ബുൾഡോസറുകളോ ഉപയോഗിച്ചുള്ള പ്രകടനങ്ങൾ കൊൽക്കത്ത പോലീസ് കമ്മീഷണർ നിരോധിച്ചു. സംഘർഷങ്ങളുമായി ബന്ധപ്പെട്ട് കൊൽക്കത്തയിൽ മാത്രം ഇതുവരെ 85-ഓളം പേരെ പോലീസ് അറസ്റ്റ് ചെയ്തിട്ടുണ്ട്.

മുതിർന്ന തൃണമൂൽ കോൺഗ്രസ് നേതാവ് ശോഭൻദേബ് ചതോപാധ്യായയുടെ വീടിന് നേരെ ആക്രമണമുണ്ടാവുകയും അദ്ദേഹത്തിന് വധഭീഷണി ഉയരുകയും ചെയ്തിട്ടുണ്ട്. കൊൽക്കത്തയിലെ ഒരു പ്രമുഖ സ്കൂളിലെ ബസ് അറ്റൻഡന്റ് വിദ്യാർത്ഥികളെക്കൊണ്ട് നിർബന്ധിച്ച് 'ജയ് ശ്രീറാം' വിളിപ്പിച്ചതായും റിപ്പോർട്ടിൽ പറയുന്നു.

പൊലീസുകാർക്ക് പരിക്ക്: നോർത്ത് 24 പർഗാനാസ് ജില്ലയിൽ ഇരുവിഭാഗങ്ങൾ തമ്മിലുണ്ടായ വെടിവെയ്പ്പിനിടയിൽ രണ്ട് പോലീസുകാർക്ക് വെടിയേറ്റു.

പ്രതിമ തകർത്തു: മുർഷിദാബാദ് ജില്ലയിൽ ബിജെപി പ്രവർത്തകർ ലെനിന്റെ പ്രതിമ തകർത്തതായി സിപിഐ(എം) ആരോപിച്ചു.

വ്യാപക കൊള്ള: അക്രമങ്ങളുടെ മറവിൽ സംസ്ഥാനത്തിന്റെ വിവിധ ഭാഗങ്ങളിൽ വ്യാപകമായി കടകൾ കൊള്ളയടിക്കപ്പെടുന്നതായി പോലീസ് സ്ഥിരീകരിച്ചു.

സ്ഥിതിഗതികൾ നിയന്ത്രണവിധേയമാക്കാൻ സംസ്ഥാനത്ത് സുരക്ഷാ സേന പട്രോളിംഗ് ശക്തമാക്കിയിട്ടുണ്ട്