വി.ഡി. സതീശനെ മുഖ്യമന്ത്രിയാക്കണമെന്ന് ആവശ്യപ്പെട്ട് കോൺഗ്രസ് പ്രവർത്തകൻ ദേഹത്ത് പെട്രോളൊഴിച്ച് ആത്മഹത്യാ ഭീഷണി

തിരുവനന്തപുരം: നിയമസഭാ തിരഞ്ഞെടുപ്പിൽ യുഡിഎഫ് ഉജ്ജ്വല വിജയം കൈവരിച്ചെങ്കിലും, മുഖ്യമന്ത്രി സ്ഥാനത്തെ ചൊല്ലിയുള്ള അനിശ്ചിതത്വം കോൺഗ്രസിനുള്ളിൽ വലിയ പ്രതിസന്ധി സൃഷ്ടിക്കുന്നു. വി.ഡി. സതീശൻ, രമേശ് ചെന്നിത്തല, കെ.സി. വേണുഗോപാൽ എന്നിവരുടെ ആരാധകരും അനുയായികളും സംസ്ഥാനത്തൊട്ടാകെ ഫ്ലക്സ് ബോർഡുകൾ ഉയർത്തിയും പ്രതിഷേധങ്ങൾ സംഘടിപ്പിച്ചും രംഗത്തെത്തിയിരിക്കുകയാണ്.

​

മുഖ്യമന്ത്രി സ്ഥാനത്തിനായി അണികൾക്കിടയിലുള്ള വികാരം പലയിടങ്ങളിലും സംഘർഷാവസ്ഥയിലേക്ക് നീങ്ങുകയാണ്. കടുത്തുരുത്തിയിൽ വി.ഡി. സതീശനെ മുഖ്യമന്ത്രിയാക്കണമെന്ന് ആവശ്യപ്പെട്ട് ഒരു കോൺഗ്രസ് പ്രവർത്തകൻ ദേഹത്ത് പെട്രോളൊഴിച്ച് ആത്മഹത്യാ ഭീഷണി മുഴക്കിയത് വലിയ പരിഭ്രാന്തി പരത്തി. കടുത്തുരുത്തി സ്വദേശിയായ ഫ്രാൻസിസാണ് പ്രതിഷേധവുമായി എത്തിയത്. ഉടൻ തന്നെ സ്ഥലത്തെത്തിയ പോലീസ് ഇയാളെ പിന്തിരിപ്പിച്ചതിനാൽ വൻ അപകടം ഒഴിവായി.