കോഴിക്കോട് ആഞ്ഞടിച്ച് വേനൽമഴ: വ്യാപക നാശനഷ്ടം

കോഴിക്കോട്: ജില്ലയിൽ വൈകുന്നേരത്തോടെ വീശിയടിച്ച ശക്തമായ കാറ്റിലും ഇടിമിന്നലോട് കൂടിയ വേനൽമഴയിലും വിവിധയിടങ്ങളിൽ വ്യാപക നാശനഷ്ടം. നഗരപ്രദേശങ്ങളിലും മലയോര മേഖലകളിലുമാണ് മഴ കനത്ത നാശം വിതച്ചത്. പലയിടങ്ങളിലും മരങ്ങൾ കടപുഴകിയും വൈദ്യുതി പോസ്റ്റുകൾ തകർന്നും ജനജീവിതം തടസ്സപ്പെട്ടു.

ചാമുണ്ടി വളപ്പിൽ നാശം: ശക്തമായ കാറ്റിൽ വൈദ്യുതി പോസ്റ്റുകൾ ഒടിഞ്ഞുവീണു. പോസ്റ്റുകൾ പതിച്ച് സമീപത്തെ വീടിന്റെ മുൻഭാഗം തകർന്നു. വീടിനു സമീപം നിർത്തിയിട്ടിരുന്ന ഒരു സ്കൂട്ടർ പൂർണ്ണമായും, മറ്റൊരു ബൈക്ക് ഭാഗികമായും തകർന്നു. ഇവിടെ വലിയൊരു അപകടമാണ് ഭാഗ്യം കൊണ്ട് ഒഴിവായത്.

തിരുവണ്ണൂരിൽ ഓട്ടോയ്ക്ക് മുകളിൽ മരം വീണു: തിരുവണ്ണൂരിൽ ഓടിക്കൊണ്ടിരുന്ന ഓട്ടോറിക്ഷയ്ക്ക് മുകളിലേക്ക് മരം കടപുഴകി വീണു. ഓട്ടോ ഡ്രൈവർ പരിക്കേൽക്കാതെ അത്ഭുതകരമായി രക്ഷപ്പെട്ടത് വലിയൊരു ദുരന്തം ഒഴിവാക്കി.

ജില്ലയുടെ വിവിധ ഭാഗങ്ങളിൽ വൈദ്യുതി ബന്ധം പൂർണ്ണമായും നിലച്ചിരിക്കുകയാണ്. വരും ദിവസങ്ങളിലും മഴ തുടരാൻ സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് അധികൃതർ അറിയിച്ചു