പേരാമ്പ്രയിൽ പെട്രോൾ പമ്പ് ജീവനക്കാരിക്ക് ക്രൂരമർദനം;സംഭവം ഓട്ടോയിൽ ചന്ദനത്തിരി കത്തിച്ചത് ചോദ്യം ചെയ്തതിന്

​പേരാമ്പ്ര: പേരാമ്പ്ര മൂരികുത്തിയിലെ പെട്രോൾ പമ്പ് ജീവനക്കാരിക്ക് നേരെ ഓട്ടോ ഡ്രൈവറുടെ ക്രൂരമായ മർദനം. ഓട്ടോയിൽ ഇന്ധനം നിറയ്ക്കുന്നതിനിടെ ചന്ദനത്തിരി കത്തിച്ചുവെച്ചത് ചോദ്യം ചെയ്തതിനാണ് കൂത്താളി സ്വദേശിയായ ഉഷയ്ക്ക് (ജീവനക്കാരി) മർദനമേറ്റത്.സംഭവത്തിൽ ഓട്ടോ ഡ്രൈവർക്കെതിരെ പേരാമ്പ്ര പോലീസ് കേസെടുത്തു

 മൂരികുത്തിയിലെ 'പ്രോമിസ് ഫ്യൂവൽസ്' (Promise Fuels) പമ്പിൽ മാർച്ച് 19-ന് രാവിലെ 7.30-ഓടെയായിരുന്നു സംഭവം.

​സംഭവം ഇങ്ങനെ:

ഓട്ടോയിൽ ഇന്ധനം നിറയ്ക്കാനെത്തിയ ഡ്രൈവറുടെ വാഹനത്തിനുള്ളിൽ ചന്ദനത്തിരി കത്തിച്ചുവെച്ചത് ശ്രദ്ധയിൽപ്പെട്ട ഉഷ, സുരക്ഷാ കാരണങ്ങളാൽ ഇത് മാറ്റാൻ ആവശ്യപ്പെടുകയായിരുന്നു. എന്നാൽ, "കത്തിച്ചാൽ നീ എന്തുചെയ്യും?" എന്ന് ചോദിച്ചുകൊണ്ട് ഡ്രൈവർ ഉഷയെ അസഭ്യം പറയുകയും കൈയ്യിലുണ്ടായിരുന്ന ഡീസൽ ടാങ്കിന്റെ അടപ്പുകൊണ്ട് തലയ്ക്ക് അടിക്കുകയുമായിരുന്നു.

​മർദനത്തിൽ തലയ്ക്ക് പരിക്കേറ്റ ഉഷ പേരാമ്പ്ര താലൂക്ക് ആശുപത്രിയിൽ ചികിത്സ തേടി. സംഭവത്തിൽ പേരാമ്പ്ര പൊലീസിൽ പരാതി നൽകിയിട്ടുണ്ട്. പമ്പിലെ സിസിടിവി ദൃശ്യങ്ങൾ കേന്ദ്രീകരിച്ച് പ്രതിക്കായി പൊലീസ് അന്വേഷണം ആരംഭിച്ചു. തൊഴിലിടങ്ങളിൽ സ്ത്രീകൾ നേരിടുന്ന അതിക്രമങ്ങൾക്കെതിരെ പ്രദേശത്ത് പ്രതിഷേധം ശക്തമാണ്.