കരുതലിന്റെ 'അരികെ'; ദയ സ്നേഹതീരം അയൽപക്ക സദസ് സംഘടിപ്പിച്ചു

​നന്തി: "കരുണാർദ്ര സമൂഹത്തിനായ് കൈകോർക്കാം" എന്ന സന്ദേശവുമായി തിക്കോടി, മൂടാടി പഞ്ചായത്തുകളിൽ ദയ സ്നേഹതീരം സംഘടിപ്പിക്കുന്ന പാലിയേറ്റീവ് കെയർ ക്യാംപയിന്റെ ഭാഗമായി കടലൂർ ഐ.ബി.യുടെ വസതിയിൽ 'അരികെ' അയൽപക്ക സദസ്സ് സംഘടിപ്പിച്ചു. പരിപാടിയുടെ ഔദ്യോഗിക ഉദ്ഘാടനം  റഷീദ് മണ്ടോളി നിർവ്വഹിച്ചു.

​രോഗശയ്യയിലുള്ളവർക്ക് മരുന്നിനേക്കാൾ പ്രധാനം നമ്മൾ നൽകുന്ന കരുതലും സാമീപ്യവുമാണ്. ഓരോ വീടിന്റെയും അയൽപക്കങ്ങളിൽ ഇത്തരം സാന്ത്വനക്കൂട്ടായ്മകൾ രൂപപ്പെടുമ്പോൾ മാത്രമാണ് ഒരു പ്രദേശം യഥാർത്ഥത്തിൽ കരുണാർദ്രമാകുന്നത്. വേദനിക്കുന്നവർക്ക് ആത്മവിശ്വാസം നൽകാൻ ഓരോരുത്തരും മുന്നിട്ടിറങ്ങണമെന്ന് ഉദ്ഘാടന പ്രസംഗത്തിൽ റഷീദ് മണ്ടോളി ഓർമ്മിപ്പിച്ചു.

​പാലിയേറ്റീവ് പരിചരണത്തിന്റെ പ്രാധാന്യം ജനങ്ങളിലെത്തിക്കാനും, ശാരീരികവും മാനസികവുമായ പ്രയാസങ്ങൾ അനുഭവിക്കുന്നവർക്ക് പ്രാദേശികമായി തുണയാകാനുമാണ് 'അരികെ' എന്ന പേരിൽ ഈ അയൽപക്ക സംഗമങ്ങൾ സംഘടിപ്പിക്കുന്നത്.

​ഹനീഫ സ്റ്റാർ അധ്യക്ഷത വഹിച്ച ചടങ്ങിൽ ബഷീർ കോവുമ്മൽ, സാഹിറ പി.കെ. എന്നിവർ പാലിയേറ്റീവ് കെയർ വിഷയത്തിൽ ക്ലാസ്സുകൾക്ക് നേതൃത്വം നൽകി. എങ്ങനെ ഒരു രോഗിയെ മാനസികമായും ശാരീരികമായും പരിചരിക്കാം എന്നതിനെക്കുറിച്ച് വിശദമായ ചർച്ചകൾ നടന്നു.

​മജീദ് റവാബി, ഹമീദ് സരിഗ, കുഞ്ഞബ്ദുള്ള കക്കുളം എന്നിവർ ആശംസകൾ നേർന്നു. ചിപ്പു നന്തി സ്വാഗതവും ഹൻസ നന്ദിയും പറഞ്ഞു. തിക്കോടി, മൂടാടി പഞ്ചായത്തുകളിലെ വിവിധ പ്രദേശങ്ങളിൽ അയൽപക്ക സദസ്സുകൾ വരും ദിവസങ്ങളിൽ തുടരുമെന്ന് സംഘാടകർ അറിയിച്ചു