ഇൻഫ്ലുവൻസർ ചിന്നു പാപ്പുവിന്റെ മരണത്തിന് പിന്നാലെ ആൺസുഹൃത്തിനെയും മരിച്ച നിലയിൽ കണ്ടെത്തി

കാസർകോട്: സോഷ്യൽ മീഡിയ ഇൻഫ്ലുവൻസർ ചിന്നു പാപ്പു എന്ന രേഷ്മയുടെ മരണത്തിന് പിന്നാലെ ആൺസുഹൃത്തായ യുവാവിനെയും മരിച്ച നിലയിൽ കണ്ടെത്തി. മന്നിപ്പാടി സ്വദേശിയായ സന്തേഷിനെയാണ് (29) മരിച്ച നിലയിൽ കണ്ടെത്തിയത്. കഴിഞ്ഞ തിങ്കളാഴ്ചയാണ് ള്ളിയത്തടുക്കയിലെ വാടക ക്വാർട്ടേഴ്സിൽ രേഷ്മയെ തൂങ്ങിമരിച്ച നിലയിൽ കണ്ടെത്തിയിരുന്നത്.

മനഃക്ലേശമെന്ന് പ്രാഥമിക നിഗമനം

രേഷ്മയുടെ മരണത്തെത്തുടർന്ന് സന്തേഷ് വലിയ രീതിയിലുള്ള മാനസിക സമ്മർദ്ദത്തിലായിരുന്നുവെന്ന് സുഹൃത്തുക്കൾ സൂചിപ്പിക്കുന്നു. യുവതിയുടെ മരണവുമായി ബന്ധപ്പെട്ട് പോലീസ് സന്തേഷിനെ മണിക്കൂറുകളോളം ചോദ്യം ചെയ്ത ശേഷം വിട്ടയച്ചിരുന്നു. പോസ്റ്റ്‌മോർട്ടം റിപ്പോർട്ട് പ്രകാരം രേഷ്മയുടേത് ആത്മഹത്യയാണെന്ന് സ്ഥിരീകരിച്ചിരുന്നുവെങ്കിലും പ്രിയപ്പെട്ടവളുടെ വേർപാട് സന്തേഷിനെ തളർത്തിയതായാണ് വിവരം.

പശ്ചാത്തലം

ആദൂർ ആലംതടുക്ക സ്വദേശിയായ രേഷ്മയും സന്തേഷും കഴിഞ്ഞ ഒരു വർഷമായി ഒരുമിച്ചായിരുന്നു താമസം. അഞ്ചു വർഷം മുൻപ് വിവാഹിതയായ രേഷ്മയെ ഭർത്താവ് ഉപേക്ഷിച്ചതാണ്. രേഷ്മയുടെ പെരുമാറ്റത്തിൽ അസ്വാഭാവികതയൊന്നും ഉണ്ടായിരുന്നില്ലെന്നാണ് ബന്ധുക്കളും സുഹൃത്തുക്കളും പോലീസിന് നൽകിയ മൊഴി. സംഭവത്തിൽ പോലീസ് അന്വേഷണം ഊർജിതമാക്കിയിട്ടുണ്ട്.