വ്യാപാരികളുടെ നേതൃത്വത്തിൽ നഗരസഭ കൗൺസിലർമാർക്ക് ആദരവും സമ്മാനകൂപ്പൺ നറുക്കെടുപ്പും

പയ്യോളി : പുതുവത്സരദിനത്തിൽ പയ്യോളിയിൽ വ്യാപാരികളുടെ നേതൃത്വത്തിൽ നഗരസഭ കൗൺസിലർമാർക്ക് ആദരവും സമ്മാന കൂപ്പൺ പദ്ധതി നറുക്കെടുപ്പും സംഘടിപ്പിച്ചു . നഗരസഭ ചെയർപേഴ്സനും വൈസ് ചെയർമാനും അടക്കമുള്ള നഗരസഭയിലെ മുഴുവൻ ജനപ്രതിനിധികളെയുമാണ് കേരള വ്യാപാരി വ്യവസായി ഏകോപനസമിതി പയ്യോളി യൂണിറ്റ് ആഭിമുഖ്യത്തിൽ ആദരിച്ചത്. പയ്യോളി ബസ് സ്റ്റാൻഡിൽ നടന്ന പരിപാടി നഗരസഭ ചെയർപേഴ്സൺ എൻ.സാഹിറ ഉദ്ഘാടനം ചെയ്തു. 

ചെയർപേഴ്സനെ വ്യാപാരി വ്യവസായ ഏകോപന സമിതി ജില്ലാ വൈസ് പ്രസിഡണ്ട് കെ.ടി. വിനോദനും , വൈസ് ചെയർമാൻ മുജേഷ് ശാസ്ത്രിയെ പ്രസിഡണ്ട് എം.ഫൈസലും പൊന്നാടണിയിച്ച് ആദരിച്ചു. മറ്റ് കൗൺസിലർമാരെ സമിതി ഭാരവാഹികളും എക്സിക്യൂട്ടീവ് അംഗങ്ങളും പൊന്നാട അണിയിച്ച് ആദരവ് നൽകി. വ്യാപാരികൾക്കുള്ള ഇൻഷുറൻസ് പരിരക്ഷ ഉദ്ഘാടനം പരിപാടിയിൽ മുഖ്യാതിഥിയായ ജില്ലാ വൈസ് പ്രസിഡണ്ട് മണിയോത്ത് മൂസഹാജി നിർവഹിച്ചു. പരിപാടിയിൽ യൂനിറ്റ് പ്രസിഡണ്ട് കെ.എം. ഷമീർ അധ്യക്ഷത വഹിച്ചു. എ.സി. സുനൈദ് സ്വാഗതവും രവീന്ദ്രൻ അമ്പാടി നന്ദിയും പറഞ്ഞു. തുടർന്ന് വ്യാപാരോത്സവത്തിന്റെ ഭാഗമായി കഴിഞ്ഞ സ്വാതന്ത്ര്യദിനത്തിൽ ആരംഭിച്ച സമ്മാനക്കൂപ്പണിൻ്റെ നറുക്കെടുപ്പ് നടന്നു. പുതുവത്സരാഘോഷത്തിന്റെ ഭാഗമായി നിരവധി കലാപരിപാടികളും അരങ്ങേറി.