സ്വകാര്യ ബസും സ്കൂട്ടറും കൂട്ടിയിടിച്ച് രണ്ട് യുവതികൾ മരിച്ചു

​കോട്ടയം: കോട്ടയത്ത് സ്വകാര്യ ബസിൽ സ്കൂട്ടർ ഇടിച്ചുണ്ടായ ഭീകരമായ അപകടത്തിൽ രണ്ട് യുവതികൾ സംഭവസ്ഥലത്ത് തന്നെ മരണപ്പെട്ടു. കോട്ടയം കെ.കെ. റോഡിൽ പാമ്പാടി 13-ാം മൈലിന് സമീപം ബുധനാഴ്ച രാവിലെയാണ് നാടിനെ നടുക്കിയ ഈ ദുരന്തം ഉണ്ടായത്. മീനടം വട്ടക്കാവ്വുങ്കൽ തോമസിന്റെ മകൾ ആഷ്‌ലി ആൻ തോമസ് (25), പാമ്പാടി മീനടം കടവുംഭാഗത്ത് കുര്യാക്കോസ് അച്ചന്റെ മകൾ കൃപ (24) എന്നിവരാണ് ദാരുണമായി മരണപ്പെട്ടത്.

​പൊൻകുന്നം ഭാഗത്തേക്ക് സ്കൂട്ടറിൽ യാത്ര ചെയ്യുകയായിരുന്നു യുവതികൾ. ഇതിനിടയിൽ കട്ടപ്പനയിൽ നിന്ന് കോട്ടയത്തേക്ക് വരികയായിരുന്ന സ്വകാര്യ ബസിലേക്ക് സ്കൂട്ടർ നിയന്ത്രണം നഷ്ടപ്പെട്ട് ഇടിക്കുകയായിരുന്നുവെന്നാണ് പ്രാഥമിക വിവരം. അപകടത്തിന്റെ ആഘാതത്തിൽ റോഡിലേക്ക് തെറിച്ചുവീണ ഇരുവരും സംഭവസ്ഥലത്ത് വെച്ചുതന്നെ ജീവൻ വെടിഞ്ഞു. വിവരമറിഞ്ഞ് പോലീസും നാട്ടുകാരും സ്ഥലത്തെത്തി മേൽനടപടികൾ സ്വീകരിച്ചു. തുടർന്ന് ഇൻക്വസ്റ്റ് നടപടികൾ പൂർത്തിയാക്കി മൃതദേഹങ്ങൾ കോട്ടയം മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി.