കാന്തപുരം വിഭാഗത്തിന്റെ സർക്കുലറിനെതിരെ എസ്എഫ്ഐ; നിലപാട് അങ്ങേയറ്റം സ്ത്രീവിരുദ്ധമെന്ന് വിമർശനം

​തിരുവനന്തപുരം: ഇസ്ലാമിക ആഘോഷങ്ങളിൽ സ്ത്രീകളെ പൊതുഇടങ്ങളിൽ പങ്കാളികളാക്കരുതെന്ന സമസ്ത കാന്തപുരം വിഭാഗത്തിന്റെ സർക്കുലറിനെതിരെ ശക്തമായ വിമർശനവുമായി എസ്എഫ്ഐ. സ്ത്രീകളെ പൊതുഇടങ്ങളിൽ പ്രദർശിപ്പിക്കരുതെന്ന സർക്കുലറിലെ പരാമർശങ്ങൾ അങ്ങേയറ്റം അപലപനീയവും ജനാധിപത്യ സമൂഹത്തിന് ചേരാത്തതുമാണെന്ന് എസ്എഫ്ഐ ഫേസ്ബുക്ക് കുറിപ്പിലൂടെ വ്യക്തമാക്കി.

​പൊതുസമൂഹത്തിന് അപമാനമെന്ന് എസ്എഫ്ഐ

​പൊതുനിരത്തുകളിലും സ്റ്റേജുകളിലും അന്യപുരുഷന്മാർക്കിടയിൽ യുവതികളെ പ്രവേശിപ്പിക്കുന്നത് അനുവദനീയമല്ല എന്ന തരത്തിലുള്ള പ്രസ്താവനകൾ ആധുനിക ജനാധിപത്യ സമൂഹത്തിന് ഒട്ടും ചേർന്നതല്ലെന്ന് സംഘടന ചൂണ്ടിക്കാട്ടി. വിദ്യാഭ്യാസം, രാഷ്ട്രീയം, ശാസ്ത്രം, കല തുടങ്ങി സമസ്ത മേഖലകളിലും സ്ത്രീകൾ നേതൃനിരയിലേക്ക് ഉയർന്നുവരുന്ന കാലഘട്ടമാണിത്. ഈ സാഹചര്യത്തിൽ അവരെ വീടിനുള്ളിൽ തളച്ചിടാനും പൊതുസമൂഹത്തിൽ നിന്ന് മാറ്റിനിർത്താനുമുള്ള ചിന്താഗതികൾ പരിഷ്കൃത സമൂഹത്തിന് അപമാനമാണെന്നും കുറിപ്പിൽ പറയുന്നു.

​സ്ത്രീവിരുദ്ധതയും അസഹിഷ്ണുതയും

​സ്ത്രീകൾ പൊതുവേദികളിൽ എത്തുന്നതിനെയും ഇടപെടുന്നതിനെയും 'പ്രദർശനം' എന്ന് വിശേഷിപ്പിക്കുന്നത് തികഞ്ഞ സ്ത്രീവിരുദ്ധതയും അസഹിഷ്ണുതയുമാണെന്ന് എസ്എഫ്ഐ വ്യക്തമാക്കി. ഇത്തരം പിന്തിരിപ്പൻ ആശയങ്ങളെ സമൂഹം ഒറ്റക്കെട്ടായി ചെറുക്കണമെന്നും സംഘടന ആവശ്യപ്പെട്ടു.