വന്ദേമാതരം വിഷയം: സ്വാതന്ത്ര്യദിനത്തിൽ സർക്കാരിന്റെ കൃത്യമായ നിലപാട് അറിയാമെന്ന് മുഖ്യമന്ത്രി വി.ഡി. സതീശൻ

തിരുവനന്തപുരം: വന്ദേമാതരം ആലപിക്കുന്നതുമായി ബന്ധപ്പെട്ട തർക്കങ്ങളിൽ സംസ്ഥാന സർക്കാരിന് കൃത്യമായ നയവും നിലപാടുമുണ്ടെന്ന് മുഖ്യമന്ത്രി വി.ഡി. സതീശൻ. പുതിയ നിയമപ്രകാരം വന്ദേമാതരം പൂർണ്ണമായി ആലപിക്കണമെന്നാണ് വ്യവസ്ഥ ചെയ്യുന്നത്. അത് പാടാതിരിക്കുകയോ അധിക്ഷേപിക്കുകയോ ചെയ്താൽ മൂന്ന് വർഷം വരെ തടവുശിക്ഷ ലഭിക്കാമെന്നും അദ്ദേഹം വ്യക്തമാക്കി. എന്നാൽ ഈ വിഷയത്തിലുള്ള സർക്കാരിന്റെ അന്തിമ നിലപാട് ഓഗസ്റ്റ് 15-ന് വ്യക്തമാകുമെന്ന് അദ്ദേഹം മാധ്യമങ്ങളോട് പറഞ്ഞു.

സ്വാതന്ത്ര്യദിന പരിപാടികളുമായി ബന്ധപ്പെട്ട തീരുമാനങ്ങൾ എടുക്കുന്നത് സംസ്ഥാന സർക്കാരാണെന്നും അദ്ദേഹം കൂട്ടിച്ചേർത്തു. കേന്ദ്ര നിയമം പാസാകുകയും രാഷ്ട്രപതി ഒപ്പുവെച്ച് വിജ്ഞാപനം വരികയും ചെയ്തിട്ടുണ്ടെങ്കിലും കോൺഗ്രസ് നേതൃത്വം നൽകുന്ന സർക്കാരിന് ഇക്കാര്യത്തിൽ വ്യക്തമായ കാഴ്ചപ്പാടുണ്ടെന്ന് അദ്ദേഹം ചൂണ്ടിക്കാണിച്ചു.

പഴയ പ്രോട്ടോക്കോൾ തുടരുമെന്ന് മന്ത്രി കെ. മുരളീധരൻ

അതേസമയം, സംസ്ഥാന സർക്കാരിന്റെ ഔദ്യോഗിക ചടങ്ങുകളിൽ വന്ദേമാതരം പൂർണ്ണമായി ആലപിക്കണമെന്ന കേന്ദ്ര നിർദ്ദേശം മന്ത്രി കെ. മുരളീധരൻ കഴിഞ്ഞ ദിവസം തള്ളിയിരുന്നു. സ്വാതന്ത്ര്യദിനത്തിൽ വന്ദേമാതരത്തിലെ മുഴുവൻ വരികളും ആലപിക്കണമെന്ന് ചീഫ് സെക്രട്ടറി വിശ്വനാഥ സിൻഹ സർക്കുലർ ഇറക്കിയിരുന്നെങ്കിലും, സംസ്ഥാനത്ത് നിലവിലുള്ള പഴയ രീതി തന്നെ തുടരുമെന്നാണ് മന്ത്രി വ്യക്തമാക്കിയത്. അതനുസരിച്ച് വന്ദേമാതരത്തിലെ ആദ്യത്തെ രണ്ട് ഖണ്ഡികകൾ മാത്രമായിരിക്കും സർക്കാർ പരിപാടികളിൽ ആലപിക്കുകയെന്നും കെ. മുരളീധരൻ കൂട്ടിച്ചേർത്തു.