നീറ്റ് ചോദ്യപേപ്പർ ചോർച്ച: എൻ.ടി.എയിൽ കടുത്ത നടപടിയുമായി കേന്ദ്രം; 47 ഉദ്യോഗസ്ഥരെ പിരിച്ചുവിട്ടു

 

  

ന്യൂഡൽഹി: നീറ്റ് (NEET) ഉൾപ്പെടെയുള്ള ദേശീയ പരീക്ഷകളുടെ ചോദ്യപേപ്പർ ചോർച്ച വിവാദങ്ങൾക്ക് പിന്നാലെ നാഷണൽ ടെസ്റ്റിംഗ് ഏജൻസിയിൽ (NTA) കടുത്ത അച്ചടക്ക നടപടിയുമായി കേന്ദ്ര സർക്കാർ. വീഴ്ച വരുത്തിയ 47 ഉദ്യോഗസ്ഥരെ ഉടൻ പ്രാബല്യത്തോടെ പിരിച്ചുവിട്ടു. ഇതിൽ ഗുരുതരമായ തെറ്റുകൾ വരുത്തിയ ഉദ്യോഗസ്ഥർക്കെതിരെ ക്രിമിനൽ നടപടികൾ ഉൾപ്പെടെയുള്ള നിയമനടപടികൾ സ്വീകരിക്കുമെന്നും കേന്ദ്രം വ്യക്തമാക്കി. രാത്രി 8 മണിയോടെയാണ് അടിയന്തര നടപടി സംബന്ധിച്ച ഔദ്യോഗിക വിവരങ്ങൾ പുറത്തുവന്നത്. വരും ദിവസങ്ങളിൽ എൻ.ടി.എ പൂർണ്ണമായും ഉടച്ചുവാർക്കുന്ന കൂടുതൽ ശക്തമായ നടപടികൾ ഉണ്ടാകും.

ഡൽഹിയിൽ നിരോധനാജ്ഞ കടുപ്പിച്ചു; ഓൺലൈൻ സർവീസുകൾക്ക് വിലക്ക്

ചോദ്യപേപ്പർ ചോർച്ചയ്‌ക്കെതിരായ പ്രക്ഷോഭങ്ങളും സമരങ്ങളും കനക്കുന്നതിനിടെ ഡൽഹിയിലെ നിരോധനാജ്ഞ നിലനിൽക്കുന്ന മേഖലകളിൽ ട്രാഫിക് പോലീസും സുരക്ഷാ സേനയും നിയന്ത്രണങ്ങൾ കടുപ്പിച്ചു. ഈ ഭാഗങ്ങളിലേക്കുള്ള ഓൺലൈൻ ടാക്സി സർവീസുകൾക്കും ഫുഡ് ഡെലിവറി ആപ്പുകൾക്കും താത്കാലിക വിലക്ക് ഏർപ്പെടുത്തിയിട്ടുണ്ട്. ഡെലിവറി ആപ്പുകൾക്ക് സർവീസുകൾ റദ്ദാക്കാൻ നിർദ്ദേശം നൽകിയ പോലീസ്, പൊതുജനങ്ങളോട് ഈ മേഖലകളിലേക്ക് യാത്ര ചെയ്യുന്നത് ഒഴിവാക്കണമെന്നും അഭ്യർത്ഥിച്ചു.

കോക്രോച്ച് ജനത പാർട്ടി (CJP) നടത്തുന്ന പ്രക്ഷോഭം അതിശക്തമായി മുന്നോട്ട് പോകുന്നതിനിടെയാണ് കേന്ദ്ര സർക്കാരിന്റെ ഭാഗത്ത് നിന്ന് എൻ.ടി.എയിലെ അടിയന്തര നടപടികൾ ഉണ്ടാകുന്നത്. അതേസമയം, കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജിക്കാര്യത്തിൽ സർക്കാരിന്റെ ഔദ്യോഗിക നിലപാട് നാളെ പ്രഖ്യാപിക്കും.

ഇന്ന് നടന്ന മന്ത്രിതല സമിതി ചർച്ചയിൽ വിദ്യാഭ്യാസ മന്ത്രിയുടെ രാജി ഒഴികെയുള്ള മറ്റെല്ലാ ആവശ്യങ്ങളും തൽക്കാലം പരിഗണിക്കാമെന്ന് സർക്കാർ സി.ജെ.പി നേതാക്കളെ അറിയിച്ചിരുന്നു. എന്നാൽ മന്ത്രിയുടെ രാജിയല്ലാതെ മറ്റൊരു ഒത്തുതീർപ്പിനുമില്ലെന്ന് സി.ജെ.പി ഉറപ്പിച്ചു പറഞ്ഞതോടെ ചർച്ച തീരുമാനമാകാതെ പിരിയുകയായിരുന്നു. കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജി ആവശ്യപ്പെട്ട് പ്രതിപക്ഷം തുടർച്ചയായ അഞ്ചാം ദിവസവും പാർലമെന്റ് നടപടികൾ പൂർണ്ണമായി സ്തംഭിപ്പിച്ചു.