അയോദ്ധ്യ രാമക്ഷേത്ര സംഭാവന തട്ടിപ്പ് കേസ്: അടിയന്തരമായി വാദം കേൾക്കേണ്ടതില്ലെന്ന് അലഹബാദ് ഹൈക്കോടതി

 

ലഖ്‌നൗ: അയോദ്ധ്യ രാമക്ഷേത്ര നിർമ്മാണത്തിനായുള്ള സംഭാവന ശേഖരണത്തിൽ തട്ടിപ്പ് നടന്നുവെന്ന ആരോപണവുമായി ബന്ധപ്പെട്ട കേസിൽ അടിയന്തരമായി വാദം കേൾക്കേണ്ടതില്ലെന്ന് അലഹബാദ് ഹൈക്കോടതി വ്യക്തമാാക്കി. ഈ വിഷയത്തിന് നിലവിൽ അടിയന്തിര പ്രാധാന്യമില്ലെന്നാണ് കോടതി നിരീക്ഷിച്ചത്. അലഹബാദ് ഹൈക്കോടതിയുടെ ലഖ്‌നൗ ബെഞ്ചിലെ ജസ്റ്റിസ് പങ്കജ് ഭാട്ട്യ, ജസ്റ്റിസ് അമിതാബ് കുമാർ റായ് എന്നിവരടങ്ങിയ അവധിക്കാല ബെഞ്ചിന്റേതാണ് (Vacation Bench) ഈ സുപ്രധാന തീരുമാനം.

സർക്കാരിന്റെ ശ്രദ്ധയിലുള്ള വിഷയം; തിരക്ക് ചൂണ്ടിക്കാട്ടി കോടതി

ലഖ്‌നൗ ബെഞ്ച് ഇപ്പോൾ തന്നെ അടിയന്തര സ്വഭാവമുള്ള ധാരാളം കേസുകൾ കൈകാര്യം ചെയ്യുന്നുണ്ടെന്ന് കോടതി ചൂണ്ടിക്കാട്ടി. കൂടാതെ, രാമക്ഷേത്ര സംഭാവന തട്ടിപ്പ് വിഷയം ഇതിനകം തന്നെ ഉത്തർപ്രദേശ് സർക്കാരിന്റെ ശ്രദ്ധയിലുള്ളതാണെന്നും, അതിനാൽ കോടതി ഇപ്പോൾ അടിയന്തരമായി ഈ കേസ് പരിഗണിക്കേണ്ട സാഹചര്യമില്ലെന്നുമാണ് അവധിക്കാല ബെഞ്ച് വിലയിരുത്തിയത്.

മോഹിത്ത് അശോക് എന്ന വ്യക്തി സമർപ്പിച്ച ഹർജിയിലാണ് ഹൈക്കോടതിയുടെ ഈ നിരീക്ഷണം. തിങ്കളാഴ്ച കോടതി പരിഗണിക്കാൻ നിശ്ചയിച്ചിരുന്ന ആകെ 592 ഹർജികളിൽ 392-ാമത്തെ കേസായാണ് മോഹിത്തിന്റെ ഈ ഹർജി ലിസ്റ്റ് ചെയ്തിരുന്നത്. ഹർജി പിന്നീട് വിശദമായ വാദത്തിനായി കോടതി മാറ്റിവെച്ചു