വാക്ക് പാലിച്ച് വിജയ്; തമിഴ്‌നാട്ടിൽ 717 മദ്യഷാപ്പുകൾ ഉടൻ പൂട്ടുന്നു, ജനവാസ മേഖലകളിൽ ഇനി മദ്യശാലകളില്ല

​ചെന്നൈ: തമിഴ്‌നാട് നിയമസഭാ തിരഞ്ഞെടുപ്പ് വേളയിൽ നൽകിയ പ്രധാന വാഗ്ദാനങ്ങളിലൊന്ന് നടപ്പിലാക്കി മുഖ്യമന്ത്രി സി. ജോസഫ് വിജയ്. സംസ്ഥാനത്തെ ആരാധനാലയങ്ങൾ, വിദ്യാഭ്യാസ സ്ഥാപനങ്ങൾ, ബസ് സ്റ്റാൻഡുകൾ എന്നിവയുടെ 500 മീറ്റർ പരിധിയിലുള്ള 717 മദ്യവിൽപന ശാലകൾ രണ്ടാഴ്ചയ്ക്കുള്ളിൽ പൂട്ടാൻ മുഖ്യമന്ത്രി ഉത്തരവിട്ടു. തമിഴ്‌നാട് സ്റ്റേറ്റ് മാർക്കറ്റിംഗ് കോർപ്പറേഷൻ (ടാസ്മാക്) അധികൃതർക്ക് ഇത് സംബന്ധിച്ച കർശന നിർദ്ദേശം കൈമാറി.

​സർവ്വേ റിപ്പോർട്ടിലെ വിവരങ്ങൾ:

പൊതുജനങ്ങളുടെ പരാതിയെത്തുടർന്ന് സർക്കാർ നടത്തിയ പ്രത്യേക സർവ്വേയിലാണ് ഇത്രയധികം മദ്യശാലകൾ നിയമവിരുദ്ധമായ പരിധിയിൽ പ്രവർത്തിക്കുന്നതായി കണ്ടെത്തിയത്.

​ആരാധനാലയങ്ങൾക്ക് സമീപം: 276 കടകൾ.

​വിദ്യാഭ്യാസ സ്ഥാപനങ്ങൾക്ക് സമീപം: 186 കടകൾ.

​ബസ് സ്റ്റാൻഡുകൾക്ക് സമീപം: 255 കടകൾ.

​വരുമാനത്തേക്കാൾ ജനക്ഷേമം:

നിലവിൽ തമിഴ്‌നാട്ടിൽ 4,829 ടാസ്മാക് കടകളാണുള്ളത്. കഴിഞ്ഞ സാമ്പത്തിക വർഷം 48,344 കോടി രൂപയുടെ വരുമാനമാണ് ഇതിലൂടെ സർക്കാരിന് ലഭിച്ചത്. മദ്യശാലകൾ പൂട്ടുന്നതിലൂടെ വലിയൊരു തുക വരുമാന നഷ്ടമുണ്ടാകുമെങ്കിലും, ബസ് സ്റ്റാൻഡുകൾ ഉൾപ്പെടെയുള്ള ഇടങ്ങളിൽ സ്ത്രീകൾ നേരിടുന്ന സുരക്ഷാ പ്രശ്നങ്ങൾ പരിഹരിക്കാനാണ് സർക്കാർ മുൻഗണന നൽകുന്നത്. സംസ്ഥാനത്ത് ഘട്ടം ഘട്ടമായി പൂർണ്ണ മദ്യനിരോധനം നടപ്പിലാക്കുന്നതിന്റെ ആദ്യപടിയായാണ് ഈ നീക്കത്തെ രാഷ്ട്രീയ നിരീക്ഷകർ വിലയിരുത്തുന്നത്.

Vijay CM orders to close 717 TASMAC liquor shops in Tamil Nadu