തമിഴ്‌നാട്ടിൽ ഇനി 'ദളപതി' ഭരണം; വിജയ് സർക്കാർ രൂപീകരിക്കും, മാജിക് നമ്പർ തികച്ച് ടി.വി.കെ

ചെന്നൈ: തമിഴക രാഷ്ട്രീയത്തിൽ പുതിയ ചരിത്രം കുറിച്ച് വിജയ്‌യുടെ തമിഴക വെട്രി കഴകം (TVK) സർക്കാർ രൂപീകരിക്കുന്നു. ഇടതുപക്ഷ പാർട്ടികളും വി.സി.കെയും പിന്തുണ പ്രഖ്യാപിച്ചതോടെ സർക്കാർ രൂപീകരിക്കാനാവശ്യമായ കേവല ഭൂരിപക്ഷം വിജയ് ഉറപ്പാക്കി.   വിജയ് ഗവർണർ രാജേന്ദ്ര അർലേക്കറെ സന്ദർശിച്ച് സർക്കാർ രൂപീകരിക്കാനുള്ള അവകാശവാദം ഉന്നയിക്കും.

234 അംഗ തമിഴ്‌നാട് നിയമസഭയിൽ ഭരണം പിടിക്കാൻ 118 എം.എൽ.എമാരുടെ പിന്തുണയാണ് വേണ്ടത്. തിരഞ്ഞെടുപ്പിൽ തനിച്ച് മത്സരിച്ച ടി.വി.കെ 107 സീറ്റുകൾ നേടി വലിയ മുന്നേറ്റം നടത്തിയിരുന്നു. കേവല ഭൂരിപക്ഷത്തിന് 11 സീറ്റുകളുടെ കുറവാണ് ഉണ്ടായിരുന്നത്.

എന്നാൽ, ഫലം പുറത്തുവന്നതിന് പിന്നാലെ 5 എം.എൽ.എമാരുള്ള കോൺഗ്രസ് വിജയ്‌ക്ക് പിന്തുണ പ്രഖ്യാപിച്ചു. ഇതോടെ ടി.വി.കെ സഖ്യത്തിന്റെ അംഗബലം 112 ആയി ഉയർന്നു. ഇന്ന് സി.പി.ഐ.എം (2), സി.പി.ഐ (2), വി.സി.കെ (2) എന്നീ പാർട്ടികൾ കൂടി പിന്തുണ അറിയിച്ചതോടെ ആകെ അംഗസംഖ്യ 118 എന്ന 'മാജിക് നമ്പറിൽ' എത്തിയിരിക്കുകയാണ്.

പുതിയ രാഷ്ട്രീയ സമവാക്യം:

സിനിമയിലെ സമാനതകളില്ലാത്ത വിജയത്തിന് ശേഷം രാഷ്ട്രീയത്തിലേക്കിറങ്ങിയ വിജയ്, ആദ്യ തിരഞ്ഞെടുപ്പിൽ തന്നെ ഭരണം പിടിക്കുന്നത് തമിഴ് രാഷ്ട്രീയത്തിലെ ദ്രാവിഡ പാർട്ടികളുടെ ആധിപത്യത്തിന് വലിയ വെല്ലുവിളിയാണ് ഉയർത്തിയിരിക്കുന്നത്. സഖ്യകക്ഷികളുമായി ചേർന്ന് സുസ്ഥിരമായ ഭരണം കാഴ്ചവെക്കാനാണ് വിജയ്‌യുടെ നീക്കം. ഗവർണറുമായുള്ള കൂടിക്കാഴ്ചയ്ക്ക് ശേഷം സത്യപ്രതിജ്ഞാ ചടങ്ങുകളെക്കുറിച്ചുള്ള ഔദ്യോഗിക പ്രഖ്യാപനമുണ്ടാകും.