സർക്കാരിന്റെ ആദ്യ നയപ്രഖ്യാപന പ്രസംഗം ആരംഭിച്ചു; വന്ദേമാതരം പൂർണ്ണമായി ആലപിക്കണമെന്ന നിർദേശം തളളി സർക്കാർ

  

തിരുവനന്തപുരം: വി.ഡി സതീശൻ സർക്കാരിന്റെ കാലാവധിയിലെ ആദ്യ നയപ്രഖ്യാപന പ്രസംഗത്തിന് നിയമസഭയിൽ തുടക്കമായി. ഗവർണറെ നിയമസഭയിലേക്ക് സ്വീകരിക്കുന്ന ചടങ്ങുമായി ബന്ധപ്പെട്ട് വന്ദേമാതരം ആലപിച്ചതിലെ ചില മാറ്റങ്ങൾ ശ്രദ്ധേയമായി. വന്ദേമാതരം പൂർണ്ണമായി ആലപിക്കണമെന്ന മുൻ നിർദേശം മറികടന്ന്, കേരള പോലീസ് ബാൻഡ് ഗാനത്തിന്റെ ആദ്യഭാഗം മാത്രമാണ് വായിച്ചത്. എന്നാൽ നയപ്രഖ്യാപന പ്രസംഗം മലയാളത്തിൽ 'നമസ്‌കാരം' പറഞ്ഞ് ആരംഭിച്ച ഗവർണർ, ഇക്കാര്യത്തിൽ മറ്റ് വിയോജിപ്പുകളോ പരാമർശങ്ങളോ നടത്തിയില്ല.

നയപ്രഖ്യാപനത്തിലെ പ്രധാന പ്രഖ്യാപനങ്ങളും നയങ്ങളും:

തൊഴിലില്ലായ്മയും സുതാര്യതയും: സംസ്ഥാനത്തെ യുവാക്കൾക്കിടയിലെ തൊഴിലില്ലായ്മ നിരക്കിലുള്ള ആശങ്കയാണ് പ്രസംഗത്തിൽ ആദ്യം ഉയർന്നുവന്നത്. സുതാര്യവും വേഗതയേറിയതുമായ ഭരണസംവിധാനത്തിലൂടെ പുതുയുഗ കേരളത്തിനായുള്ള ശ്രമങ്ങൾ നടത്തുമെന്ന് നയപ്രഖ്യാപനത്തിൽ വ്യക്തമാക്കുന്നു.

അഴിമതിരഹിത ഭരണം: പൂർണ്ണമായും അഴിമതിരഹിതമായ ഭരണം കാഴ്ചവെക്കുമെന്നും ഉദ്യോഗസ്ഥതലത്തിൽ കാര്യക്ഷമതയും ക്രിയാത്മകതയും ഉറപ്പാക്കുമെന്നും സർക്കാർ പ്രഖ്യാപിച്ചു.

സാമ്പത്തിക ധവളപത്രം: സംസ്ഥാനത്തിന്റെ യഥാർത്ഥ സാമ്പത്തിക സ്ഥിതി ജനങ്ങൾക്ക് മുന്നിൽ വ്യക്തമാക്കുന്നതിനായി ഉടൻ തന്നെ 'ധവളപത്രം' പുറത്തിറക്കും. അതേസമയം സേവന മേഖലകളിൽ നിന്നുള്ള പിന്മാറ്റം ഉണ്ടാകില്ല.

കേന്ദ്രവുമായുള്ള സഹകരണം: കേന്ദ്ര സർക്കാരുമായി പരമാവധി സഹകരിച്ചു മുന്നോട്ട് പോകാനാണ് തീരുമാനം. സംസ്ഥാനത്തിന് അർഹമായ പിന്തുണ കേന്ദ്രത്തിൽ നിന്ന് പ്രതീക്ഷിക്കുന്നതായും ഗവർണർ പറഞ്ഞു.

ഇന്ദിരാ ഗ്യാരന്റിയും വയോജന വകുപ്പും: തെരഞ്ഞെടുപ്പ് വാഗ്ദാനമായ 'ഇന്ദിരാ ഗ്യാരന്റി' നടപ്പാക്കുന്നതുമായി സർക്കാർ മുന്നോട്ട് പോകും. ഇതിന്റെ ഭാഗമായി ആദ്യ മന്ത്രിസഭാ യോഗത്തിൽ തന്നെ വയോജന വകുപ്പ് രൂപീകരിക്കാൻ തീരുമാനിച്ചിട്ടുണ്ട്.

വികസന-കാർഷിക പദ്ധതികൾ:

റോഡ്, ജലം, വ്യോമ ഗതാഗത സംവിധാനങ്ങളെ പരസ്പരം ബന്ധിപ്പിച്ചുകൊണ്ടുള്ള ബൃഹദ് ഗതാഗത പദ്ധതി നടപ്പിലാക്കും.

മനുഷ്യ-മൃഗ സംഘർഷം രൂക്ഷമായ മേഖലകളിൽ പ്രത്യേക ശ്രദ്ധ കേന്ദ്രീകരിക്കും.

കാർഷിക മേഖലയുടെ സമഗ്ര പുരോഗതിക്കായി വനിതാ കർഷകരുടെ കൺസോർഷ്യം ഈ വർഷം തന്നെ യാഥാർത്ഥ്യമാക്കും.

ശാസ്ത്രീയമായ മണ്ണ് പരിശോധനാ സംവിധാനങ്ങൾ കൊണ്ടുവരുന്നതിനൊപ്പം സുഗന്ധവ്യഞ്ജന പാർക്കുകളും പൊതു-സ്വകാര്യ പങ്കാളിത്തത്തോടെയുള്ള (PPP) മറ്റ് വികസന പദ്ധതികളും നടപ്പിലാക്കുമെന്നും നയപ്രഖ്യാപനത്തിൽ വ്യക്തമാക്കുന്നു