ജാഗ്രത! കോവിഡിന്റെ പുതിയ വകഭേദം 'സിക്കാഡ' അതിവേഗം പടരുന്നു; 23 രാജ്യങ്ങളിൽ സ്ഥിരീകരിച്ചു

വാഷിങ്ടൺ: ആഗോളതലത്തിൽ വീണ്ടും കോവിഡ് ഭീതി പടർത്തി കൊറോണ വൈറസിന്റെ പുതിയ വകഭേദം 'സിക്കാഡ' (BA.3.2) പടരുന്നതായി റിപ്പോർട്ട്. അമേരിക്കയുൾപ്പെടെ 23-ലധികം രാജ്യങ്ങളിൽ ഇതിനോടകം ഈ വകഭേദം സ്ഥിരീകരിച്ചിട്ടുണ്ട്. സാധാരണ വൈറസുകളെ അപേക്ഷിച്ച് അതിവേഗത്തിലുള്ള വ്യാപനശേഷിയും ജനിതക മാറ്റങ്ങളുമാണ് ഇതിനെ അപകടകാരിയാക്കുന്നത്.

എന്താണ് 'സിക്കാഡ' വകഭേദം?

2021-ൽ ലോകത്തെ വിറപ്പിച്ച ഒമിക്രോൺ വകഭേദത്തിന്റെ പിൻഗാമിയായാണ് BA.3.2 അറിയപ്പെടുന്നത്. വർഷങ്ങളോളം മണ്ണിനടിയിൽ കഴിഞ്ഞ ശേഷം പുറത്തുവരുന്ന 'സിക്കാഡ' എന്ന ഷഡ്പദത്തിന്റെ പേരാണ് ഈ വകഭേദത്തിന് നൽകിയിരിക്കുന്നത്. 2024 അവസാനത്തോടെ ദക്ഷിണാഫ്രിക്കയിലാണ് ഈ വകഭേദം ആദ്യമായി തിരിച്ചറിഞ്ഞത്. 2025-ഓടെ ഇത് ലോകത്തിന്റെ വിവിധ ഭാഗങ്ങളിലേക്ക് അതിവേഗം വ്യാപിക്കുകയായിരുന്നു.

ആരോഗ്യവിദഗ്ധരുടെ ആശങ്ക:

വൈറസിന്റെ സ്‌പൈക് പ്രോട്ടീനിൽ ഏകദേശം 70 മുതൽ 75 വരെ ജനിതക മാറ്റങ്ങൾ സംഭവിച്ചിട്ടുണ്ടെന്നാണ് ശാസ്ത്രജ്ഞർ വ്യക്തമാക്കുന്നത്. ഈ മാറ്റങ്ങൾ കാരണം ശരീരത്തിന്റെ സ്വാഭാവിക പ്രതിരോധ ശേഷിയെയും നിലവിലുള്ള വാക്സിനുകളെയും മറികടക്കാൻ വൈറസിന് കെൽപ്പുണ്ടെന്നതാണ് ഏറ്റവും വലിയ വെല്ലുവിളി.

നിലവിൽ 23 രാജ്യങ്ങളിൽ കേസുകൾ റിപ്പോർട്ട് ചെയ്ത സാഹചര്യത്തിൽ ആഗോളതലത്തിൽ നിരീക്ഷണം ശക്തമാക്കാൻ ലോകാരോഗ്യ സംഘടന നിർദ്ദേശം നൽകിയിട്ടുണ്ട്.