കൊയിലാണ്ടിയിൽ യുഡിഎഫ് പടയൊരുക്കം; അഡ്വ. കെ. പ്രവീൺ കുമാർ നാമനിർദ്ദേശ പത്രിക സമർപ്പിച്ചു

കൊയിലാണ്ടി: നിയമസഭാ തെരഞ്ഞെടുപ്പിൽ കൊയിലാണ്ടി മണ്ഡലത്തിലെ യുഡിഎഫ് സ്ഥാനാർത്ഥി അഡ്വ. കെ. പ്രവീൺ കുമാർ നാമനിർദ്ദേശ പത്രിക സമർപ്പിച്ചു. സിവിൽ സ്റ്റേഷനിൽ വരണാധികാരിയായ തഹസിൽദാർ മുൻപാകെയാണ് പത്രിക സമർപ്പിച്ചത്. ഉച്ചയ്ക്ക് 12.30-ഓടെ പ്രമുഖ നേതാക്കൾക്കൊപ്പമാണ് അദ്ദേഹം പത്രികാ സമർപ്പണത്തിനായി എത്തിയത്.

കൊയിലാണ്ടി എസ്.ബി.ഐ ബാങ്കിന് സമീപത്തുനിന്ന് ആരംഭിച്ച് സിവിൽ സ്റ്റേഷനിലേക്ക് നീങ്ങിയ ഉജ്ജ്വലമായ പ്രകടനത്തിൽ നൂറുകണക്കിന് പ്രവർത്തകർ പങ്കെടുത്തു. മണ്ഡലത്തിൽ യുഡിഎഫിന്റെ ആത്മവിശ്വാസം വിളിച്ചോതുന്നതായിരുന്നു പ്രവർത്തകരുടെ ഈ പങ്കാളിത്തം.

മുൻ കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രൻ, ടി.ടി. ഇസ്മയിൽ, മഠത്തിൽ നാണു, അഹമ്മദ് പുന്നക്കൽ, മഠത്തിൽ അബ്ദുറഹിമാൻ, ടി.പി. ഭാസ്കരൻ തുടങ്ങിയ പ്രമുഖ നേതാക്കൾ പ്രകടനത്തിന് നേതൃത്വം നൽകി. പത്രികാ സമർപ്പണത്തിന് ശേഷം മണ്ഡലത്തിലെ വിവിധ കേന്ദ്രങ്ങളിൽ സ്ഥാനാർത്ഥി പര്യടനം തുടരും.