റീൽസ് ഷൂട്ടിങ്ങിനായി പിതാവിനെ ചാക്കിലാക്കി കൊറിയർ അയക്കാൻ ശ്രമം; ബെംഗളൂരുവിൽ ഒരു കുടുംബത്തിന്റെ ക്രൂരമായ സാഹസം

 

ബെംഗളൂരു: സോഷ്യൽ മീഡിയയിൽ 'റീച്ച്' ലഭിക്കാനായി സ്വന്തം പിതാവിനെ ചാക്കിലാക്കി കൊറിയർ അയക്കാൻ ശ്രമിച്ച യുവതിയും കുടുംബവും പിടിയിൽ. ബെംഗളൂരുവിലെ വ്യാലിക്കാവൽ പോലീസ് സ്റ്റേഷൻ പരിധിയിലാണ് മനസാക്ഷിയെ ഞെട്ടിക്കുന്ന ഈ സംഭവം നടന്നത്. സംഭവത്തിൽ യുവതി, ഭർത്താവ്, അമ്മായിയമ്മ, ഭർതൃസഹോദരൻ എന്നിവരെ പോലീസ് താക്കീത് ചെയ്ത് വിട്ടയച്ചു.

ഒരു വലിയ പാർസലുമായി കൊറിയർ ഓഫീസിലെത്തിയ കുടുംബത്തോട് അതിനുള്ളിൽ എന്താണെന്ന് ജീവനക്കാർ തിരക്കിയെങ്കിലും വ്യക്തമായ മറുപടി നൽകാൻ അവർ തയ്യാറായില്ല. സംശയം തോന്നിയ ജീവനക്കാർ ചാക്ക് തുറന്നു പരിശോധിച്ചപ്പോഴാണ് പ്രായമായ ഒരാളെ ഉള്ളിൽ കണ്ടെത്തിയത്. യുവതിയുടെ പിതാവിനെയാണ് റീൽസ് ചിത്രീകരണത്തിനായി ഇവർ ചാക്കിനുള്ളിലാക്കിയത്.

പിന്നിലെ ലക്ഷ്യം:

ഉഗാദി, റംസാൻ തുടങ്ങിയ ഉത്സവ സീസണുകളിൽ ബസ് ടിക്കറ്റ് ലഭിക്കാനുള്ള പ്രയാസം അധികൃതരുടെ ശ്രദ്ധയിൽപ്പെടുത്താനാണ് ഇത്തരമൊരു 'റീൽ' ചെയ്യാൻ ശ്രമിച്ചതെന്നാണ് കുടുംബം പോലീസിനോട് പറഞ്ഞത്. ടിക്കറ്റ് കിട്ടാത്ത സാഹചര്യത്തിൽ ആളുകളെ കൊറിയർ ചെയ്യുകയല്ലാതെ മറ്റ് വഴികളില്ല എന്ന് കാണിക്കാനായിരുന്നു ഇവരുടെ നീക്കം. എന്നാൽ ചാക്കിനുള്ളിൽ ശ്വാസമെടുക്കാൻ പോലും കഴിയാതെ വയോധികൻ അവശനായ നിലയിലായിരുന്നുവെന്ന് റിപ്പോർട്ടുകൾ സൂചിപ്പിക്കുന്നു.

തങ്ങളുടെ പ്രവൃത്തി പിടിക്കപ്പെട്ടിട്ടും, പാർസൽ സ്വീകരിക്കണമെന്ന് പറഞ്ഞ് ഇവർ ജീവനക്കാരുമായി തർക്കിച്ചു. ഒടുവിൽ പോലീസ് ഇടപെടുകയും ഇവരെ സ്റ്റേഷനിലേക്ക് മാറ്റുകയും ചെയ്തു. നിരുത്തരവാദപരമായ പെരുമാറ്റത്തിന് മാപ്പ് അപേക്ഷിച്ചുകൊണ്ടുള്ള വീഡിയോ റെക്കോർഡ് ചെയ്യിച്ച ശേഷം പോലീസ് ഇവരെ വിട്ടയച്ചു.