സ്ഥാനാർത്ഥി പ്രഖ്യാപനത്തിന് പിന്നാലെ മുസ്‌ലിം ലീഗിൽ പരസ്യമായ ‘പൊട്ടിത്തെറി’; നൂർബീന റഷീദും രണ്ടത്താണിയും രംഗത്ത്

​കോഴിക്കോട്: നിയമസഭാ തെരഞ്ഞെടുപ്പിനുള്ള സ്ഥാനാർത്ഥി പട്ടിക പുറത്തുവന്നതിന് പിന്നാലെ മുസ്‌ലിം ലീഗിൽ ഭിന്നത രൂക്ഷമാകുന്നു. വനിതാ ലീഗ് നേതാവ് നൂർബീന റഷീദും മുതിർന്ന നേതാവ് അബ്ദുറഹ്മാൻ രണ്ടത്താണിയും നേതൃത്വത്തിനെതിരെ പരസ്യമായി രംഗത്തെത്തി. തഴയപ്പെട്ടതിലുള്ള അതൃപ്തിയും സ്ഥാനാർത്ഥി നിർണ്ണയത്തിലെ മാനദണ്ഡങ്ങളുമാണ് ഇരുവരും ചോദ്യം ചെയ്യുന്നത്.

​വനിതാ ലീഗിനെ അവഗണിച്ചെന്ന് നൂർബീന റഷീദ്

​വനിതാ ലീഗ് ദേശീയ ജനറൽ സെക്രട്ടറി നൂർബീന റഷീദ് കടുത്ത നിലപാടിലാണ്. സ്ഥാനാർത്ഥി പട്ടികയിൽ വനിതാ ലീഗിനെ പൂർണ്ണമായും അവഗണിച്ചുവെന്ന് അവർ ആരോപിച്ചു. ഫാത്തിമ തഹ്‌ലിയയെയും ജയന്തി രാജനെയും സ്ഥാനാർത്ഥികളാക്കിയെങ്കിലും വനിതാ ലീഗിന് അർഹമായ പ്രാധാന്യം ലഭിച്ചില്ലെന്നാണ് പരാതി. പരസ്യ പ്രതികരണത്തിന് മുൻപ് തന്നെ വിഷയം പാർട്ടിയെ അറിയിച്ചിരുന്നതായും അവർ വ്യക്തമാക്കി.

​തിരൂരങ്ങാടിയിൽ ‘പി.എം.എ സമീർ വേണ്ട’; രണ്ടത്താണി ഫേസ്ബുക്കിൽ

​തിരൂരങ്ങാടി മണ്ഡലത്തിൽ പി.എം.എ സമീറിനെ സ്ഥാനാർത്ഥിയാക്കിയതിനെതിരെയാണ് അബ്ദുറഹ്മാൻ രണ്ടത്താണി രംഗത്തെത്തിയത്. തങ്ങന്മാരെ കരുവാക്കി ചിലരുടെ താല്പര്യങ്ങൾ സംരക്ഷിക്കാനാണ് സമീറിനെ കൊണ്ടുവന്നതെന്ന് അദ്ദേഹം ഫേസ്ബുക്കിൽ കുറിച്ചു. ലോക്കൽ കമ്മിറ്റികളോ പ്രവർത്തകരോ ആവശ്യപ്പെടാത്ത ഒരാളെ അർഹരായവരെ തഴഞ്ഞ് മത്സരിപ്പിക്കുന്നത് ശരിയല്ലെന്നും, പ്രതിഫലം ഇല്ലാതെ പാർട്ടിക്കായി പണിയെടുക്കുന്നവർ വികാരം പ്രകടിപ്പിക്കുന്നത് അച്ചടക്ക ലംഘനമായി കാണരുതെന്നും അദ്ദേഹം കൂട്ടിച്ചേർത്തു.

​സ്ഥാനാർത്ഥി പ്രഖ്യാപനത്തിന് പിന്നാലെ പ്രമുഖ നേതാക്കൾ തന്നെ അതൃപ്തി പരസ്യമാക്കിയത് വരും ദിവസങ്ങളിൽ ലീഗ് നേതൃത്വത്തിന് വലിയ തലവേദനയാകും.