ഇറാനിൽ സൈനിക നടപടി അവസാനിപ്പിക്കാൻ ട്രംപ്; ലക്ഷ്യങ്ങൾ പൂർത്തിയായതായി പ്രഖ്യാപനം

​

വാഷിംഗ്ടൺ: ഇറാനിലെ സൈനിക നീക്കങ്ങൾ അവസാനിപ്പിക്കുന്നതിനെക്കുറിച്ച് ആലോചിക്കുന്നതായി അമേരിക്കൻ പ്രസിഡന്റ് ഡൊണാൾഡ് ട്രംപ്. തന്റെ ലക്ഷ്യങ്ങൾ ഏകദേശം പൂർത്തിയായതായി സ്വന്തം സോഷ്യൽ മീഡിയ പ്ലാറ്റ്‌ഫോമായ 'ട്രൂത്ത് സോഷ്യലിൽ' ട്രംപ് കുറിച്ചു. ഇറാനിലെ നിലവിലെ ഭരണകൂടവുമായി ചർച്ചകൾക്ക് തയ്യാറാണെന്ന സൂചനയും അദ്ദേഹം നൽകി.

​യുദ്ധത്തിൽ നിന്ന് അമേരിക്ക പിന്മാറുന്നു എന്നതിന്റെ വ്യക്തമായ സൂചനകളാണ് ട്രംപിന്റെ വാക്കുകളിലുള്ളത്. എന്നാൽ ഇപ്പൊഴത്തെ സാഹചര്യത്തിൽ വെടിനിർത്തൽ പ്രഖ്യാപിക്കില്ലെന്ന് അദ്ദേഹം വ്യക്തമാക്കി. ശത്രുപക്ഷത്തെ പൂർണ്ണമായും തകർക്കുന്ന ഘട്ടത്തിൽ വെടിനിർത്തൽ പ്രഖ്യാപിക്കുന്നതിൽ അർത്ഥമില്ലെന്നാണ് ട്രംപിന്റെ വിശദീകരണം.

​ഹോർമുസ് കടലിടുക്കിന്റെ സുരക്ഷ: നാറ്റോയ്ക്കെതിരെ രൂക്ഷവിമർശനം

ലോകത്തെ പ്രധാന ചരക്കുനീക്ക പാതയായ ഹോർമുസ് കടലിടുക്കിന്റെ സുരക്ഷാ കാര്യത്തിൽ സഖ്യകക്ഷികൾക്കെതിരെ ട്രംപ് രൂക്ഷവിമർശനം ഉയർത്തി. കടലിടുക്കിനെ ആശ്രയിക്കുന്ന രാജ്യങ്ങൾ തന്നെ അതിന്റെ സുരക്ഷാ ചുമതല ഏറ്റെടുക്കണമെന്ന് ട്രംപ് ആവശ്യപ്പെട്ടു. ഈ മേഖലയിൽ സുരക്ഷ ഉറപ്പാക്കാൻ സൈന്യത്തെ അയക്കാൻ മടിക്കുന്ന നാറ്റോ (NATO) സഖ്യകക്ഷികളുടെ നിലപാടിനെ 'ഭീരുത്വം' എന്നാണ് അദ്ദേഹം വിശേഷിപ്പിച്ചത്.