മമ്മൂട്ടിക്കെതിരായ സൈബർ ആക്രമണം: പരസ്യമായി ഖേദം പ്രകടപ്പിച്ച് മുഖ്യമന്ത്രി പിണറായി വിജയൻ

തിരുവനന്തപുരം: വയനാട് ടൗൺഷിപ്പ് സന്ദർശനവുമായി ബന്ധപ്പെട്ട് നടൻ മമ്മൂട്ടിക്കെതിരെ നടന്ന സൈബർ ആക്രമണങ്ങളിൽ മുഖ്യമന്ത്രി പിണറായി വിജയൻ പരസ്യമായി ഖേദം പ്രകടിപ്പിച്ചു. തിരുവനന്തപുരം ജനറൽ ആശുപത്രിയിലെ പുതിയ ബഹുനില മന്ദിരത്തിന്റെ ഉദ്ഘാടന ചടങ്ങിൽ സംസാരിക്കവെയാണ് മുഖ്യമന്ത്രി തന്റെ നിലപാട് വ്യക്തമാക്കിയത്.

മമ്മൂട്ടിയെപ്പോലൊരു മഹാനടനെ സൈബർ ഇടങ്ങളിൽ അപമാനിക്കുന്നത് അങ്ങേയറ്റം നിർഭാഗ്യകരമാണെന്ന് മുഖ്യമന്ത്രി പറഞ്ഞു. ഇത്തരം ആക്രമണങ്ങൾ നടത്തിയവർക്ക് അദ്ദേഹത്തെ മനസ്സിലാക്കാൻ സാധിച്ചില്ലെന്നും, ഈ സംഭവത്തിൽ മമ്മൂട്ടിക്കുണ്ടായ മനഃപ്രയാസത്തിൽ താൻ പരസ്യമായി ക്ഷമ ചോദിക്കുന്നുവെന്നും അദ്ദേഹം കൂട്ടിച്ചേർത്തു.

വിവാദത്തിന്റെ പശ്ചാത്തലം

വയനാട് ടൗൺഷിപ്പ് സന്ദർശനത്തിനിടെ കൂടെയുണ്ടായിരുന്ന സി.പി.എം ജില്ലാ സെക്രട്ടറി കെ. റഫീഖിനോട് മമ്മൂട്ടി ചില അതൃപ്തികൾ പ്രകടിപ്പിച്ചതാണ് വിവാദങ്ങൾക്ക് ആധാരമായത്. രാഷ്ട്രീയ നേതാക്കൾ എപ്പോഴും കൂടെ നിൽക്കുന്നത് ജനങ്ങൾക്കിടയിൽ തെറ്റിദ്ധാരണയുണ്ടാക്കാൻ ഇടയാക്കുമെന്ന് മമ്മൂട്ടി സൂചിപ്പിച്ചിരുന്നു. ഈ സംഭാഷണത്തിന്റെ വീഡിയോ പുറത്തുവന്നതോടെയാണ് സോഷ്യൽ മീഡിയയിൽ ഒരു വിഭാഗം ആളുകൾ നടനെതിരെ തിരിഞ്ഞത്.

മുഖ്യമന്ത്രിയുടെ ഈ ഇടപെടൽ സൈബർ ഇടങ്ങളിലെ അനാവശ്യമായ വാക്പോരുകൾക്ക് അറുതി വരുത്തുമെന്നാണ് കരുതപ്പെടുന്നത്.