സംസ്ഥാനത്ത് ഓട്ടോ-ടാക്സി പണിമുടക്ക് പിൻവലിച്ചു; നിരക്ക് വർധന തത്വത്തിൽ അംഗീകരിച്ച് സർക്കാർ, ജനുവരി 1-ന് പുതിയ നിരക്ക്

തിരുവനന്തപുരം: ഓട്ടോ-ടാക്സി നിരക്കുകൾ പുതുക്കി നിശ്ചയിക്കണമെന്നാവശ്യപ്പെട്ട് തൊഴിലാളി യൂണിയനുകൾ പ്രഖ്യാപിച്ചിരുന്ന പണിമുടക്ക് പിൻവലിച്ചു. ഗതാഗത മന്ത്രി സി.പി. ജോണുമായി നടത്തിയ ചർച്ചയിലാണ് തീരുമാനം. നിരക്ക് വർധിപ്പിക്കണമെന്ന ആവശ്യം സർക്കാർ തത്വത്തിൽ അംഗീകരിച്ചതായും, വിഷയം പഠിക്കാൻ അടിയന്തരമായി കമ്മീഷനെ നിയോഗിക്കുമെന്നും ചർച്ചയ്ക്ക് ശേഷം തൊഴിലാളി സംഘടനാ പ്രതിനിധികൾ വ്യക്തമാക്കി. കമ്മീഷൻ പഠനത്തിന് ശേഷം ജനുവരി ഒന്ന് മുതൽ പുതുക്കിയ നിരക്ക് പ്രാബല്യത്തിൽ വരുമെന്ന് മന്ത്രി ഉറപ്പുനൽകിയതായും അവർ അറിയിച്ചു.

കമ്മീഷൻ തെളിവെടുപ്പ് നടത്തുമ്പോൾ ഓരോ യൂണിയനുകൾക്കും തങ്ങളുടെ നിർദ്ദേശങ്ങൾ സമർപ്പിക്കാം. ഓട്ടോ ഡ്രൈവർമാർക്ക് ഇ.എസ്.ഐ. ആനുകൂല്യം നൽകണമെന്ന ആവശ്യം അനുഭാവപൂർവ്വം പരിഗണിക്കാമെന്ന് സർക്കാർ ഉറപ്പുനൽകിയതായും സംഘടനകൾ കൂട്ടിച്ചേർത്തു.

തൊഴിലാളി പ്രതിനിധികളുമായി നടത്തിയ ഫലപ്രദമായ ചർച്ചയുടെ അടിസ്ഥാനത്തിലാണ് സമരം പിൻവലിച്ചതെന്ന് ഗതാഗത മന്ത്രി സി.പി. ജോൺ സ്ഥിരീകരിച്ചു. 2022-ലാണ് സംസ്ഥാനത്ത് അവസാനമായി ഓട്ടോ-ടാക്സി നിരക്കുകൾ പരിഷ്കരിച്ചത്. നിരക്ക് പുതുക്കണമെന്ന ട്രേഡ് യൂണിയനുകളുടെ ആവശ്യം ന്യായമാണെന്ന് കണ്ട് സർക്കാർ തത്വത്തിൽ അംഗീകരിക്കുകയായിരുന്നു. കമ്മീഷൻ അംഗങ്ങളെ ഉടൻ തീരുമാനിക്കുമെന്നും മന്ത്രി അറിയിച്ചു.

ഡ്രൈവർമാർക്ക് ഇ.എസ്.ഐ. നൽകുന്ന കാര്യത്തിന് പുറമെ, അവർക്കായി വിശ്രമമുറി സൗകര്യങ്ങൾ ഒരുക്കുന്നതിനായി ടൂറിസം വകുപ്പുമായും ഹോട്ടൽ ഉടമകളുമായും സംസാരിച്ചിട്ടുണ്ടെന്നും ഇതിൽ അനുകൂല തീരുമാനമുണ്ടാകുമെന്നും മന്ത്രി പറഞ്ഞു. ടൂവീലർ ടാക്സുകൾ നിയമപരമായി അനുവദനീയമാണെങ്കിലും, മഞ്ഞ ബോർഡിന് പകരം സ്വകാര്യ ആവശ്യങ്ങൾക്കുള്ള വെള്ള ബോർഡ് വെച്ച് അനധികൃതമായി ടാക്സി സർവീസ് നടത്തുന്നത് കർശനമായി തടയാൻ തീരുമാനിച്ചതായും മന്ത്രി വ്യക്തമാക്കി