യുഎഇയിൽ മിസൈൽ ആക്രമണ ശ്രമം; ഇറാന് പങ്കില്ലെന്ന് വിശദീകരണം, വാണിജ്യ ഇടപാടുകൾ നിർത്തിവെച്ച് യുഎഇ

ടെഹ്‌റാൻ: യുഎഇക്ക് നേരെയുണ്ടായ മിസൈൽ ആക്രമണ ശ്രമത്തെത്തുടർന്ന് മേഖലയിൽ നയതന്ത്ര തർക്കങ്ങളും ആശങ്കയും ശക്തമാകുന്നു. കഴിഞ്ഞ രാത്രി നാവിക ഗതാഗത സംവിധാനങ്ങളെ ലക്ഷ്യമിട്ടെത്തിയ രണ്ട് മിസൈലുകൾ യുഎഇ വിജയകരമായി തകർത്തു. സംഭവം ഗൗരവമായി എടുത്ത യുഎഇ, ഇറാനുമായുള്ള എല്ലാത്തരം വ്യാപാര, വാണിജ്യ, സാമ്പത്തിക വിനിമയങ്ങളും താൽക്കാലികമായി നിർത്തിവെച്ചതായി പ്രഖ്യാപിച്ചു.

ഇറാന്റെ നിഷേധം

അതേസമയം, യുഎഇക്ക് നേരെയുണ്ടായ ആക്രമണത്തിന് പിന്നിൽ തങ്ങളല്ലെന്ന വിശദീകരണവുമായി ഇറാൻ രംഗത്തെത്തി. പശ്ചിമേഷ്യയിൽ ആശയക്കുഴപ്പം സൃഷ്ടിക്കാൻ ഇസ്രയേൽ നടത്തിയ തെറ്റിദ്ധരിപ്പിക്കൽ ആക്രമണമാകാം ഇതെന്നാണ് ഇറാന്റെ വാദം.

ക്രൂഡോയിൽ വില കുത്തനെ കൂട്ടി

ഹോർമുസ് കടലിടുക്കിലെ അനിശ്ചിതത്വവും പുതിയ ആക്രമണ ശ്രമങ്ങളും ലോക വിപണിയെയും പ്രതികൂലമായി ബാധിച്ചിട്ടുണ്ട്. ഇതോടെ ക്രൂഡോയിൽ വില ജൂലൈയ്ക്ക് ശേഷമുള്ള ഏറ്റവും ഉയർന്ന നിരക്കിലെത്തി. ഹോർമുസ് തുറക്കുന്നതുമായി ബന്ധപ്പെട്ട് ഇറാൻ വെച്ച ഉപാധികൾ അംഗീകരിക്കാൻ അമേരിക്ക ഇതുവരെ തയ്യാറായിട്ടില്ല.

അമേരിക്കയുടെ നിലപാട്

ഇറാനുമായുള്ള ചർച്ചകളിൽ പുരോഗതിയില്ലാത്ത സാഹചര്യത്തിൽ, രാജ്യത്തിന് മേൽ സാമ്പത്തിക സമ്മർദ്ദം ശക്തമാക്കാനാണ് യുഎസ് പ്രസിഡന്റ് ഡോണൾഡ് ട്രംപിന്റെ നിർദ്ദേശം. പുതിയ നിർദ്ദേശങ്ങൾ വരുന്നത് വരെ ഇറാനുമായി ചർച്ചകൾക്ക് മുൻകൈ എടുക്കേണ്ടതില്ലെന്നാണ് അമേരിക്കയുടെ തീരുമാനം. എന്നിരുന്നാലും, മേഖലയിൽ അമേരിക്കയുടെ സ്വാധീനം കുറയുകയാണെന്നും വരുംദിവസങ്ങളിൽ ഇറാന് നിർണ്ണായക പങ്കുള്ള പുതിയ അന്താരാഷ്ട്ര ക്രമം വരുമെന്നും ഇറാൻ അവകാശപ്പെട്ടു.