ലോകകപ്പ് ഫൈനലിൽ അർജന്റീനയ്ക്ക് പിന്തുണയുമായി ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു.

 

ഫിഫ ലോകകപ്പ് ഫൈനൽ പോരാട്ടത്തിന് മണിക്കൂറുകൾ മാത്രം ബാക്കിനിൽക്കെ, ലയണൽ മെസ്സിക്കും അർജന്റീന ടീമിനും ഔദ്യോഗിക പിന്തുണ പ്രഖ്യാപിച്ച് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. ഇസ്രയേലിലെ അർജന്റീനയുടെ അംബാസഡർ റാബി ഷിമോൺ ആക്‌സൽ വഹ്നിഷുമായി ജെറുസലേമിൽ കൂടിക്കാഴ്‌ച നടത്തിയ നെതന്യാഹു, ഫൈനൽ മത്സരത്തിൽ അർജന്റീനയ്ക്ക് തകർപ്പൻ വിജയം കൈവരിക്കാനാകട്ടെ എന്ന് ആശംസിച്ചു. പ്രധാനമന്ത്രിയുടെ ഔദ്യോഗിക ഓഫീസിൽ വെച്ച് നടന്ന കൂടിക്കാഴ്‌ചയുടെ ദൃശ്യങ്ങൾ ഇസ്രയേൽ പുറത്തുവിട്ടിട്ടുണ്ട്. കൂടിക്കാഴ്‌ചയ്ക്കിടെ അർജന്റീന പ്രസിഡന്റ് ജാവിയർ മിലെയ്, നെതന്യാഹുവുമായുള്ള തന്റെ ആഴത്തിലുള്ള സൗഹൃദത്തെക്കുറിച്ച് വ്യക്തമാക്കുന്ന പ്രത്യേക ഓഡിയോ സന്ദേശം അംബാസഡർ വഹ്നിഷ് ഇസ്രയേൽ പ്രധാനമന്ത്രിയെ കേൾപ്പിച്ചു.താങ്കൾ എന്റെ പ്രിയപ്പെട്ട സുഹൃത്താണ്, എപ്പോഴും ഞങ്ങളെ ശക്തമായി പിന്തുണയ്ക്കുന്നു. ഞാൻ കാരണമാണ് താങ്കൾ ഇപ്പോൾ അർജന്റീനയ്ക്ക് വേണ്ടി നിലകൊള്ളുന്നതെന്ന് കേട്ടപ്പോൾ എനിക്ക് ഏറെ സന്തോഷം തോന്നി,എന്നായിരുന്നു അർജന്റീനൻ പ്രസിഡന്റ് ജാവിയർ മിലെയുടെ ഓഡിയോ സന്ദേശത്തിലുണ്ടായിരുന്നത്. ഇരു രാജ്യങ്ങളും തമ്മിലുള്ള നയതന്ത്ര-രാഷ്ട്രീയ സൗഹൃദം കായിക വേദിയിലേക്കും നീളുന്ന കാഴ്ചയാണ് ഈ കൂടിക്കാഴ്ചയോടെ പ്രകടമാകുന്നത്.