പാലക്കാട് വിദ്യാർത്ഥികൾക്കിടയിലേക്ക് ലോറി പാഞ്ഞുകയറി വൻ അപകടം; ഒരു മരണം, മൂന്ന് പേർക്ക് ഗുരുതര പരിക്ക്

​പാലക്കാട്: പാലക്കാട് മുണ്ടൂരിൽ വിദ്യാർത്ഥികൾക്കിടയിലേക്ക് ലോറി പാഞ്ഞുകയറി ഒരു വിദ്യാർത്ഥി മരിച്ചു. മൂന്ന് പേർക്ക് അപകടത്തിൽ ഗുരുതരമായി പരിക്കേറ്റിട്ടുണ്ട്. മുണ്ടൂർ യുവക്ഷേത്ര കോളേജിലെ വിദ്യാർത്ഥിയായ മുഹമ്മദ് ഫർഹാൻ ആണ് മരിച്ചത്.

​പാലക്കാട് മുണ്ടൂർ ഒമ്പതാം മൈലിൽ വെച്ചാണ് നാടിനെ നടുക്കിയ ഈ ദാരുണ അപകടം സംഭവിച്ചത്. ആശുപത്രി മാലിന്യങ്ങളുമായി അമിതവേഗതയിൽ പോവുകയായിരുന്ന ലോറി നിയന്ത്രണം വിട്ട് വിദ്യാർത്ഥികൾക്ക് നേരെ ഇടിച്ചുകയറുകയായിരുന്നു.

​അപകടം നടന്നയുടൻ തന്നെ നാട്ടുകാരും പോലീസും ചേർന്ന് പരിക്കേറ്റ വിദ്യാർത്ഥികളെ ആശുപത്രിയിൽ എത്തിച്ചെങ്കിലും മുഹമ്മദ് ഫർഹാന്റെ ജീവൻ രക്ഷിക്കാനായില്ല. പരിക്കേറ്റ് ചികിത്സയിൽ കഴിയുന്ന മറ്റ് മൂന്ന് വിദ്യാർത്ഥികളുടെ നില അതീവ ഗുരുതരമായി തുടരുകയാണെന്നാണ് വിവരം. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്