വേണ്ടിവന്നാൽ ഇനിയും കൊല്ലും, ഞാൻ ഗാന്ധിജിയല്ല"; കോടതിയിലും പരസ്യ വെല്ലുവിളിയുമായി നെന്മാറ ഇരട്ടക്കൊലക്കേസ് പ്രതി ചെന്താമര

പാലക്കാട്: കേരളത്തെ ഒന്നടങ്കം നടുക്കിയ നെന്മാറ കൊലപാതക പരമ്പരയിലെ ഇരട്ടക്കൊല കേസിലും പ്രതി ചെന്താമര കുറ്റക്കാരനാണെന്ന് കോടതി കണ്ടെത്തി. പാലക്കാട് അഡീഷണൽ സെഷൻസ് കോടതിയാണ് പ്രതി കുറ്റക്കാരനാണെന്ന് കണ്ടെത്തിയത്. എന്നാൽ, ഈ മൂന്ന് കൊലപാതകങ്ങൾ നടത്തിയിട്ടും യാതൊരുവിധ ഭാവഭേദമോ കുറ്റബോധമോ ഇല്ലാതെയാണ് വിധി കേൾക്കാൻ ചെന്താമര കോടതിയിലെത്തിയത്. കുറ്റബോധമില്ലെന്ന് മാത്രമല്ല, ജഡ്ജിക്ക് മുൻപിലും ഓപ്പൺ കോടതിയിലും കടുത്ത വെല്ലുവിളികളാണ് പ്രതി നടത്തിയത്.

"ഒരു ചെകിടത്ത് അടിച്ചാൽ മറ്റേ ചെകിടും കാണിക്കാൻ താൻ ഗാന്ധിജിയല്ല" എന്നായിരുന്നു കോടതിയിൽ ചെന്താമരയുടെ ആദ്യ പ്രതികരണം. വേണ്ടി വന്നാൽ ഇനിയും ആളുകളെ കൊല്ലുമെന്നും പ്രതി കോടതിയിൽ വിളിച്ചുപറഞ്ഞു. "എഴുതാൻ പറ്റുന്നത് എഴുതിക്കോ, എനിക്കൊരു പ്രശ്നവുമില്ല. ഇങ്ങനെ ഒരു അവസ്ഥ നിങ്ങൾക്കും വരണം, അപ്പോൾ അറിയാം. എനിക്ക് തടസ്സം നിന്നാൽ ഇങ്ങനെയായിരിക്കും പെരുമാറ്റം" എന്ന് ജഡ്ജിയെ നോക്കി പരസ്യമായി വെല്ലുവിളിക്കാനും പ്രതി മടിച്ചില്ല.

പ്രതികാര ബുദ്ധിയോടെയുള്ള കൊലപാതക പരമ്പര

തന്റെ ഭാര്യയും മക്കളും പിണങ്ങിപ്പോയതിന് കാരണം അയൽവാസിയുടെ ദുർമന്ത്രവാദം മൂലമാണെന്ന് തെറ്റിദ്ധരിച്ചാണ് ചെന്താമര കൊലപാതക പരമ്പരയ്ക്ക് തുടക്കമിടുന്നത്. ആദ്യം അയൽവാസിയായ 35 വയസ്സുകാരിയെ ഇയാൾ ക്രൂരമായി വെട്ടിക്കൊലപ്പെടുത്തി. ഈ കേസിൽ അറസ്റ്റിലായി അഞ്ച് വർഷത്തോളം ജയിലിൽ കഴിഞ്ഞ ശേഷം ജാമ്യത്തിലിറങ്ങിയ പ്രതിയിൽ പ്രതികാര ചിന്തകൾ ഒടുങ്ങിയിരുന്നില്ല.

ജാമ്യത്തിലിറങ്ങിയ ഉടൻ തന്നെ കൊല്ലപ്പെട്ട സ്ത്രീയുടെ ഭർത്താവിനെയും അമ്മയെയും ഇയാൾ വെട്ടിക്കൊലപ്പെടുത്തുകയായിരുന്നു. ഈ ഇരട്ടക്കൊല കേസിലാണ് ഇപ്പോൾ കോടതി പ്രതി കുറ്റക്കാരനാണെന്ന് വിധി പ്രസ്താവിച്ചിരിക്കുന്നത്. പ്രതി കോടതിയിൽ നടത്തിയ അസാധാരണമായ വെല്ലുവിളികളും അക്രമാസക്തമായ പെരുമാറ്റവും കോടതി വളപ്പിൽ വലിയ ചർച്ചയായിട്ടുണ്ട്.