വാണിജ്യ എൽ.പി.ജി സിലിണ്ടർ വില കുറഞ്ഞു; ആശ്വാസത്തോടെ ഹോട്ടൽ മേഖല, ഗാർഹിക സിലിണ്ടർ നിരക്കിൽ മാറ്റമില്ല

​ന്യൂഡൽഹി: രാജ്യത്ത് വാണിജ്യ ആവശ്യങ്ങൾക്കുള്ള എൽ.പി.ജി (19 കിലോഗ്രാം) സിലിണ്ടറുകളുടെ വിലയിൽ വലിയ കുറവ് രേഖപ്പെടുത്തി. സിലിണ്ടറൊന്നിന് 180 രൂപയാണ് കുറച്ചത്. ഇതോടെ പുതുക്കിയ നിരക്ക് 2951 രൂപയായി. അതേസമയം, സാധാരണക്കാരായ ജനങ്ങളെ ബാധിക്കുന്ന ഗാർഹിക ആവശ്യങ്ങൾക്കുള്ള 14.2 കിലോഗ്രാം സിലിണ്ടറുകളുടെ വിലയിൽ ഇത്തവണ മാറ്റമൊന്നും വരുത്തിയിട്ടില്ല. ഈ വർഷം ആദ്യമായാണ് വാണിജ്യ സിലിണ്ടറുകളുടെ വില കുറയ്ക്കുന്നത് എന്ന പ്രത്യേകതയുമുണ്ട്. കഴിഞ്ഞ ഏതാനും മാസങ്ങളായി ആയിരത്തോളം രൂപയുടെ വർദ്ധനവ് ഉണ്ടായതിനാൽ ഹോട്ടൽ-റസ്റ്റോറന്റ് മേഖലയ്ക്ക് ഈ വിലക്കുറവ് നേരിയ ആശ്വാസം മാത്രമാണ് സമ്മാനിക്കുന്നത്.

​വിവിധ നഗരങ്ങളിലെ വിപണി സാഹചര്യം അനുസരിച്ച് 173 രൂപ മുതൽ 183.50 രൂപ വരെയുള്ള കുറവാണ് 19 കിലോഗ്രാമിന്റെ വാണിജ്യ സിലിണ്ടറുകൾക്ക് ഉണ്ടായിരിക്കുന്നത്. തലസ്ഥാനമായ ഡൽഹിയിലും ലഖ്‌നൗവിലും വിലയിൽ 183.50 രൂപയുടെ പരമാവധി കുറവുണ്ടായപ്പോൾ കൊൽക്കത്തയിൽ 174 രൂപയാണ് കുറഞ്ഞത്. ചണ്ഡീഗഢിൽ 181.50 രൂപയുടെയും പട്നയിൽ 173 രൂപയുടെയും ഇടിവ് സിലിണ്ടർ നിരക്കിൽ രേഖപ്പെടുത്തിയിട്ടുണ്ട്.

​പശ്ചിമേഷ്യയിലെ വെടിനിർത്തലും ആഗോള വിപണിയും

​പശ്ചിമേഷ്യയിൽ നിലനിന്നിരുന്ന കടുത്ത യുദ്ധസമാനമായ സാഹചര്യങ്ങൾക്ക് പിന്നാലെയാണ് വാണിജ്യ സിലിണ്ടർ വില കുതിച്ചുയർന്ന് മൂവായിരം രൂപയ്ക്ക് മുകളിൽ എത്തിയിരുന്നത്. എന്നാൽ, യു.എസും ഇറാനും തമ്മിൽ 60 ദിവസത്തെ പുതിയ വെടിനിർത്തൽ കരാറിൽ ഏർപ്പെട്ടതോടെ അന്താരാഷ്ട്ര വിപണിയിൽ അസംസ്‌കൃത എണ്ണവില വലിയ തോതിൽ ഇടിഞ്ഞു.

​ആഗോള എണ്ണ-വാതക ഗതാഗതത്തിന്റെ ഏകദേശം 20 ശതമാനത്തോളം കൈകാര്യം ചെയ്യുന്ന നിർണ്ണായകമായ ഹോർമുസ് കടലിടുക്കിലൂടെയുള്ള കപ്പൽ ഗതാഗതം വീണ്ടും സജീവമായതും വിപണിക്ക് അനുകൂലമായ അന്തരീക്ഷമൊരുക്കി. എന്നാൽ, രാജ്യാന്തര വിപണിയിലുണ്ടായ അത്രയും വലിയ ആനുപാതിക കുറവ് വാണിജ്യ എൽ.പി.ജി വിലയിൽ വരുത്താൻ എണ്ണക്കമ്പനികൾ തയ്യാറായിട്ടില്ലെന്ന ആക്ഷേപവും ശക്തമാണ്.