തമിഴകത്ത് വിജയ് കൊടുങ്കാറ്റ്; ഡിഎംകെ ആസ്ഥാനം വിജനം, പന്തലുകൾ പൊളിച്ചുനീക്കി; ടിവികെ 100 കടന്നു

 

ചെന്നൈ: തമിഴ് രാഷ്ട്രീയത്തിൽ ദ്രാവിഡ കോട്ടകളെ തകർത്തെറിഞ്ഞ് നടൻ വിജയുടെ തമിഴക വെട്രി കഴകം (TVK) വിജയക്കുതിപ്പിൽ. വോട്ടെണ്ണലിന്റെ ആദ്യഘട്ടത്തിൽ തന്നെ കരുത്തുകാട്ടിയ വിജയുടെ പാർട്ടി നിലവിൽ 104 സീറ്റുകളിൽ ലീഡ് ചെയ്യുകയാണ്. ആദ്യ തിരഞ്ഞെടുപ്പിൽ തന്നെ തമിഴ്നാടിന്റെ രാഷ്ട്രീയ ചരിത്രം തിരുത്തിക്കുറിച്ചുള്ള വിജയുടെ ഈ മുന്നേറ്റം ഡിഎംകെ ക്യാമ്പിനെ ഞെട്ടിച്ചിരിക്കുകയാണ്.

അണ്ണാ അറിവാലയം വിജനമായി

തിരിച്ചടി അപ്രതീക്ഷിതമായതോടെ ഡിഎംകെ ആസ്ഥാനമായ അണ്ണാ അറിവാലയത്തിൽ നിന്ന് പ്രവർത്തകർ പിൻവാങ്ങിത്തുടങ്ങി. രാവിലെ വിജയം ആഘോഷിക്കാൻ എത്തിയവർക്കായി ഒരുക്കിയിരുന്ന പന്തലുകളും കസേരകളും അഴിച്ചുമാറ്റുന്ന ദൃശ്യങ്ങളാണ് ചെന്നൈയിൽ നിന്ന് പുറത്തുവരുന്നത്. വോട്ടെണ്ണൽ ദിനത്തിൽ സാധാരണ സജീവമാകാറുള്ള പാർട്ടി ഓഫീസ് ഇപ്പോൾ അക്ഷരാർത്ഥത്തിൽ നിശബ്ദമാണ്. നഗരപ്രദേശങ്ങളിൽ വിജയുടെ പാർട്ടി നേടിയ വൻ മുന്നേറ്റം ഡിഎംകെയുടെ വോട്ട് ബാങ്കിൽ വലിയ വിള്ളലുണ്ടാക്കി.

തിരിച്ചുവരവ് നടത്തി എഐഎഡിഎംകെ

അതേസമയം, എടപ്പാടി പളനിസ്വാമിയുടെ നേതൃത്വത്തിൽ എഐഎഡിഎംകെ ശക്തമായ തിരിച്ചുവരവ് നടത്തുകയാണ്. നിലവിൽ 64 സീറ്റുകളിൽ പാർട്ടി മുന്നിട്ടുനിൽക്കുന്നു. പതിറ്റാണ്ടുകളായി ഡിഎംകെയും എഐഎഡിഎംകെയും മാത്രം അടക്കിവാണിരുന്ന തമിഴ് മണ്ണിൽ വിജയുടെ കടന്നുവരവോടെ പോരാട്ടം ത്രികോണമായി മാറി. നിലവിലെ സൂചനകൾ പ്രകാരം ലീഡ് നിലയിൽ ഡിഎംകെ മൂന്നാം സ്ഥാനത്തേക്ക് പിന്തള്ളപ്പെട്ടിരിക്കുകയാണ്.

തമിഴ്നാട്ടിലെ രാഷ്ട്രീയ സമവാക്യങ്ങൾ അടിമുടി മാറ്റുന്ന വിജയുടെ ഈ മുന്നേറ്റം ദേശീയ തലത്തിലും വലിയ ചർച്ചകൾക്ക് വഴിതുറന്നു കഴിഞ്ഞു