വടകര ബിജെപിയിൽ പൊട്ടിത്തെറി; മൂന്ന് നേതാക്കളെ പുറത്താക്കി, ജില്ലാ പ്രസിഡന്റിന്റെ കോലം കത്തിച്ച് പ്രവർത്തകർ

 

വടകര: പ്രമുഖ നേതാക്കളെ പാർട്ടിയിൽ നിന്ന് പുറത്താക്കിയ നടപടിക്ക് പിന്നാലെ വടകര ബിജെപിയിൽ കടുത്ത ആഭ്യന്തര കലഹം. അച്ചടക്ക നടപടിക്ക് നേതൃത്വം നൽകിയ ബിജെപി നോർത്ത് ജില്ലാ പ്രസിഡന്റ് സി.ആർ. പ്രഫുൽ കൃഷ്ണന്റെ കോലം പ്രവർത്തകർ പരസ്യമായി കത്തിച്ചു. ശനിയാഴ്ച വൈകുന്നേരം വടകര നഗരത്തിൽ പ്രതിഷേധ പ്രകടനം നടത്തിയ ശേഷമായിരുന്നു പ്രവർത്തകരുടെ ഈ കടുത്ത പ്രതിഷേധം.

നടപടിക്ക് പിന്നിൽ 'വിമത' നീക്കം

സംഘടനാ വിരുദ്ധ പ്രവർത്തനം നടത്തിയെന്നാരോപിച്ചാണ് വടകരയിലെ പ്രമുഖ നേതാക്കളായ വി.ടി. വിനീഷ്, എ.വി. ഗണേശൻ, പി. ശ്യാംരാജ് കുരിയാടി എന്നിവരെ ജില്ലാ പ്രസിഡന്റ് പുറത്താക്കിയത്. നിയമസഭാ തിരഞ്ഞെടുപ്പിൽ പാർട്ടി സ്ഥാനാർത്ഥിക്കെതിരെ വിമതനായി പത്രിക നൽകിയതും അതിനെ സഹായിച്ചതുമാണ് നടപടിക്ക് കാരണമായി നേതൃത്വം ചൂണ്ടിക്കാട്ടുന്നത്. ഇവർക്ക് പുറമെ നാദാപുരം മണ്ഡലത്തിലെ ആറ് പ്രവർത്തകർക്കെതിരെയും നടപടി സ്വീകരിച്ചിട്ടുണ്ട്.

പുറത്താക്കപ്പെട്ട നേതാക്കളും അവരുടെ അനുയായികളും വടകരയിൽ നടന്ന പ്രതിഷേധ പ്രകടനത്തിൽ അണിനിരന്നു. തങ്ങൾക്കെതിരെ നടപടിയെടുക്കുന്നതിന് മുമ്പ് വിശദീകരണം ചോദിക്കാനുള്ള സാമാന്യ മര്യാദ പോലും ജില്ലാ നേതൃത്വം കാണിച്ചില്ലെന്ന് നേതാക്കൾ കുറ്റപ്പെടുത്തി. ഏകപക്ഷീയമായ ഈ നടപടിക്കെതിരെ വരും ദിവസങ്ങളിൽ ശക്തമായ പ്രതിഷേധവുമായി മുന്നോട്ട് പോകാനാണ് ഇവരുടെ തീരുമാനം.

തിരഞ്ഞെടുപ്പ് രാഷ്ട്രീയത്തിൽ നിർണ്ണായകമായ വടകര മേഖലയിൽ ബിജെപിക്കുള്ളിലുണ്ടായ ഈ ചേരിതിരിവ് രാഷ്ട്രീയ കേന്ദ്രങ്ങളിൽ വലിയ ചർച്ചയായിട്ടുണ്ട്.