യുവാവിനെയും പെൺകുട്ടിയെയും വീട്ടിനുള്ളിൽ മരിച്ച നിലയിൽ കണ്ടെത്തി

​കോഴിക്കോട് മൂഴിക്കലിൽ പെൺകുട്ടിയെയും യുവാവിനെയും മരിച്ച നിലയിൽ കണ്ടെത്തി; കൊലപാതകത്തിന് ശേഷം ആത്മഹത്യയെന്ന് നിഗമനം

​

കോഴിക്കോട്: മൂഴിക്കലിൽ പതിനാറുകാരിയായ പെൺകുട്ടിയെയും ഇരുപതുകാരനായ യുവാവിനെയും വീടിന്റെ മുകൾ നിലയിൽ മരിച്ച നിലയിൽ കണ്ടെത്തി. പെൺകുട്ടിയെ കൊലപ്പെടുത്തിയ ശേഷം യുവാവ് ജീവനൊടുക്കിയതാണെന്നാണ് പോലീസിന്റെ പ്രാഥമിക നിഗമനം. ചൊവ്വാഴ്ച രാവിലെയാണ് വീട്ടുകാരും നാട്ടുകാരും വിവരം അറിയുന്നത്.

​തിങ്കളാഴ്ച രാത്രിയാണ് ദാരുണമായ സംഭവം നടന്നതെന്നാണ് കരുതപ്പെടുന്നത്. മരിച്ച രണ്ടുപേരും തമ്മിൽ ബന്ധുക്കളാണെന്ന് പോലീസ് സ്ഥിരീകരിച്ചിട്ടുണ്ട്. പെൺകുട്ടിയുടെ വീടിന്റെ മുകൾ നിലയിലെ മുറിയിലാണ് മൃതദേഹങ്ങൾ കണ്ടെത്തിയത്. സംഭവത്തിൽ പോലീസ് ഇൻക്വസ്റ്റ് നടപടികൾ പൂർത്തിയാക്കി.

​മൃതദേഹങ്ങൾ പോസ്റ്റ്‌മോർട്ടം നടപടികൾക്കായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. സംഭവസ്ഥലത്ത് ഫോറൻസിക് വിദഗ്ധരും പോലീസും കൂടുതൽ പരിശോധനകൾ നടത്തിവരികയാണ്. മരണത്തിലേക്ക് നയിച്ച സാഹചര്യത്തെക്കുറിച്ച് പോലീസ് വിശദമായ അന്വേഷണം ആരംഭിച്ചിട്ടുണ്ട്.