പാമ്പുകടി ഭീതി തുടരുന്നു; തോട്ടപ്പള്ളിയിൽ മധ്യവയസ്‌കൻ ഐസിയുവിൽ, ജില്ലയിൽ കഴിഞ്ഞദിവസം രണ്ട് മരണം

ആലപ്പുഴയിൽ പാമ്പുകടി ഭീതി തുടരുന്നു; തോട്ടപ്പള്ളിയിൽ മധ്യവയസ്‌കൻ ഐസിയുവിൽ, ജില്ലയിൽ കഴിഞ്ഞദിവസം രണ്ട് മരണം

ആലപ്പുഴ: ജില്ലയിൽ പാമ്പുകടി സംഭവങ്ങൾ വർധിക്കുന്നത് ജനങ്ങളെ ഭീതിയിലാഴ്ത്തുന്നു. തോട്ടപ്പള്ളിയിൽ പാമ്പുകടിയേറ്റ മധ്യവയസ്‌കനെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചു. തോട്ടപ്പള്ളി സ്വദേശി സാലി (51) ആണ് വണ്ടാനം മെഡിക്കൽ കോളേജ് ആശുപത്രിയിലെ ഐ.സി.യുവിൽ ചികിത്സയിലുള്ളത്. വെള്ളിയാഴ്ച രാത്രി 12.30-ഓടെയായിരുന്നു സംഭവം.

ജില്ലയിൽ കഴിഞ്ഞദിവസം രണ്ട് മരണം

കഴിഞ്ഞദിവസം പാമ്പുകടിയേറ്റ് ജില്ലയിൽ രണ്ട് സ്ത്രീകൾ മരണപ്പെട്ടിരുന്നു. കായംകുളം മർക്കന്റൈൽ വെൽഫെയർ കോ-ഓപ്പറേറ്റീവ് സൊസൈറ്റി സെക്രട്ടറിയായ സലീന (42) ആണ് മരിച്ച ഒരാൾ. കൊറ്റുകുളങ്ങരയിൽ വിവാഹ സൽക്കാരത്തിൽ പങ്കെടുത്തുകൊണ്ടിരിക്കെയാണ് സലീനയ്ക്ക് പാമ്പുകടിയേറ്റത്.

കുട്ടനാട് വൈശ്യംഭാഗം സ്വദേശിനി ഇന്ദിര (65) ആണ് പാമ്പുകടിയേറ്റ് മരിച്ച രണ്ടാമത്തെയാൾ. വൈശ്യംഭാഗം പുതുവന വീട്ടിൽ രഘുവിന്റെ ഭാര്യയാണ് ഇന്ദിര. ജില്ലയുടെ വിവിധ ഭാഗങ്ങളിൽ പാമ്പ് ശല്യം രൂക്ഷമാകുന്നത് വലിയ ആശങ്കയ്ക്ക് കാരണമായിട്ടുണ്ട്.

സുരക്ഷിതരായിരിക്കാം:

രാത്രികാലങ്ങളിൽ ശ്രദ്ധിക്കുക: രാത്രി പുറത്തിറങ്ങുമ്പോൾ നിർബന്ധമായും ടോർച്ച് ഉപയോഗിക്കുക.

പരിസരം വൃത്തിയാക്കുക: വീടിന് ചുറ്റുമുള്ള കാടുകളും പാഴ്വസ്തുക്കളും നീക്കം ചെയ്യുക. വിറക് പുരകളും മറ്റും പരിശോധിക്കുമ്പോൾ ജാഗ്രത പാലിക്കുക.

അടിയന്തര ചികിത്സ: പാമ്പുകടിയേറ്റാൽ സമയം കളയാതെ ഉടൻ തന്നെ പാമ്പ് വിഷത്തിന് ചികിത്സയുള്ള മെഡിക്കൽ കോളേജിലോ മറ്റ് വലിയ ആശുപത്രികളിലോ എത്തിക്കുക.