ട്രെയിനിന് മുകളിൽ റീൽസ് ചിത്രീകരണം; ഇലക്ട്രിക് ലൈനിൽ നിന്ന് ഷോക്കേറ്റ യുവാവിന്റെ നില ഗുരുതരം

​

തിക്കോടി: നിർത്തിയിട്ടിരുന്ന ട്രെയിനിന് മുകളിൽ കയറി റീൽസ് ചിത്രീകരിക്കുന്നതിനിടെ യുവാവിന് അതിശക്തമായ വൈദ്യുതാഘാതമേറ്റു. പയ്യോളി അയനിക്കാട് വെസ്റ്റ് യുപി സ്കൂളിന് സമീപം താമസിക്കുന്ന സിനാൻ (18) ആണ് ഗുരുതരാവസ്ഥയിൽ ചികിത്സയിലുള്ളത്. ഇന്ന് പുലർച്ചെ തിക്കോടി റെയിൽവേ സ്റ്റേഷന് സമീപമായിരുന്നു അപകടം.

​  

തിക്കോടിയിൽ നിർത്തിയിട്ടിരുന്ന ട്രെയിനിന്റെ മുകളിൽ കയറി സുഹൃത്തിനൊപ്പം റീൽസ് വീഡിയോ എടുക്കുകയായിരുന്നു സിനാൻ. ഇതിനിടെ ബാലൻസ് തെറ്റി താഴേക്ക് വീഴാൻ പോയപ്പോൾ രക്ഷപ്പെടാനായി മുകളിലെ ഹൈടെൻഷൻ ഇലക്ട്രിക് ലൈനിൽ പിടിക്കുകയായിരുന്നു. വലിയ ശബ്ദത്തോടെ ഷോക്കേറ്റ യുവാവ് ട്രെയിനിന് മുകളിലേക്ക് തന്നെ തെറിച്ചുവീണു.

​രക്ഷാപ്രവർത്തനവും ആരോഗ്യനിലയും:

ഒപ്പമുണ്ടായിരുന്ന സുഹൃത്തിന്റെ നിലവിളി കേട്ടെത്തിയ നാട്ടുകാരാണ് ഉടൻ തന്നെ രക്ഷാപ്രവർത്തനം നടത്തിയത്. പ്രാഥമിക ചികിത്സയ്ക്കായി കൊയിലാണ്ടി താലൂക്ക് ആശുപത്രിയിൽ എത്തിച്ചെങ്കിലും പരിക്കുകൾ ഗുരുതരമായതിനാൽ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. സിനാന്റെ ശരീരത്തിൽ 90 ശതമാനത്തിലധികം പൊള്ളലേറ്റിട്ടുണ്ടെന്നും നില അതീവ ഗുരുതരമായി തുടരുകയാണെന്നും ആശുപത്രി അധികൃതർ അറിയിച്ചു.