ഛത്തീസ്ഗഢിൽ പവർ പ്ലാൻ്റ് ബോയിലർ പൊട്ടിത്തെറിച്ചു; 10 തൊഴിലാളികൾ കൊല്ലപ്പെട്ടു, നിരവധി പേർക്ക് പരിക്ക്

റായ്‌പൂർ: ഛത്തീസ്ഗഢിലെ ശക്തി ജില്ലയിൽ വേദാന്ത ലിമിറ്റഡിൻ്റെ പവർ പ്ലാൻ്റിലുണ്ടായ ബോയിലർ സ്ഫോടനത്തിൽ 10 തൊഴിലാളികൾ മരിച്ചു. ചൊവ്വാഴ്ച ഉച്ചയോടെയാണ് സിംഗിതാരൈ ഗ്രാമത്തിൽ പ്രവർത്തിക്കുന്ന പ്ലാന്റിൽ ദാരുണമായ അപകടമുണ്ടായത്. സ്ഫോടനത്തിൽ നാൽപ്പതോളം പേർക്ക് പരിക്കേറ്റതായാണ് പ്രാഥമിക വിവരം.

രക്ഷാപ്രവർത്തനം തുടരുന്നു:

പ്ലാന്റിലെ ബോയിലർ ട്യൂബ് പൊട്ടിത്തെറിച്ചതാണ് അപകടത്തിന് കാരണമായത്. സ്ഫോടനസമയത്ത് നിരവധി തൊഴിലാളികൾ പ്ലാന്റിനുള്ളിൽ ജോലിയിലുണ്ടായിരുന്നു. തകർന്ന അവശിഷ്ടങ്ങൾക്കിടയിൽ കൂടുതൽ പേർ കുടുങ്ങിക്കിടക്കുന്നതായി ആശങ്കയുണ്ട്. ജില്ലാ ഭരണകൂടവും പോലീസും സ്ഥലത്തെത്തി യുദ്ധകാലാടിസ്ഥാനത്തിൽ രക്ഷാപ്രവർത്തനം നടത്തിവരികയാണ്.

സ്ഥിതി ഗുരുതരം:

പരിക്കേറ്റവരെ സമീപത്തെ ആശുപത്രികളിൽ പ്രവേശിപ്പിച്ചു. ഇവരിൽ പലരുടെയും ആരോഗ്യനില അതീവ ഗുരുതരമായി തുടരുന്നതിനാൽ മരണസംഖ്യ ഇനിയും ഉയരാൻ സാധ്യതയുണ്ടെന്ന് മുതിർന്ന പോലീസ് ഉദ്യോഗസ്ഥർ വ്യക്തമാക്കി.

അപകടകാരണത്തെക്കുറിച്ച് വിശദമായ അന്വേഷണം ആരംഭിച്ചിട്ടുണ്ട്. പ്ലാന്റിലെ സുരക്ഷാ മാനദണ്ഡങ്ങളിൽ വീഴ്ചയുണ്ടായോ എന്ന കാര്യവും അധികൃതർ പരിശോധിച്ചുവരികയാണ്