പശ്ചിമേഷ്യൻ സംഘർഷം: കേരളത്തിലെ കയറ്റുമതി മേഖല സ്തംഭനത്തിൽ; കോടികളുടെ നഷ്ടം

തിരുവനന്തപുരം: പശ്ചിമേഷ്യയിൽ യുദ്ധസമാനാമായ സാഹചര്യം നിലനിൽക്കുന്നത് കേരളത്തിലെ കയറ്റുമതി മേഖലയെ കടുത്ത പ്രതിസന്ധിയിലാക്കുന്നു. സംസ്ഥാനത്തെ വിമാനത്താവളങ്ങൾ വഴിയുള്ള പഴം, പച്ചക്കറി, മത്സ്യ വിഭവങ്ങളുടെ കയറ്റുമതി പൂർണ്ണമായും നിലച്ചതോടെ ഈ മേഖലയിൽ കോടികളുടെ സാമ്പത്തിക നഷ്ടമാണ് റിപ്പോർട്ട് ചെയ്തിരിക്കുന്നത്.

വ്യോമഗതാഗതം തടസ്സപ്പെട്ടതും ഹോർമുസ് കടലിടുക്ക് (Strait of Hormuz) അടച്ചതിനെത്തുടർന്ന് കപ്പൽ വഴിയുള്ള ചരക്കുനീക്കം മുടങ്ങിയതുമാണ് തിരിച്ചടിയായത്. റംസാൻ വിപണി ലക്ഷ്യമിട്ടുള്ള കയറ്റുമതി താളംതെറ്റിയത് കർഷകർക്കും വ്യാപാരികൾക്കും വലിയ ആഘാതമായി.

 

കയറ്റുമതി നിലച്ചു: പ്രതിദിനം ശരാശരി 150 ടൺ പഴം-പച്ചക്കറി വിഭവങ്ങളാണ് കേരളത്തിൽ നിന്ന് വിദേശത്തേക്ക് അയച്ചിരുന്നത്. ഇതിൽ വലിയൊരു ഭാഗം കൈകാര്യം ചെയ്തിരുന്ന തിരുവനന്തപുരം വിമാനത്താവളത്തിൽ നിന്ന് ഇപ്പോൾ ഒരു ടൺ പോലും കയറ്റുമതി നടക്കുന്നില്ല.

റംസാൻ വിപണി നഷ്ടമായി: 

ഗൾഫ് രാജ്യങ്ങളിലേക്ക് സീസൺ കണക്കാക്കി അയച്ചിരുന്ന ഉൽപ്പന്നങ്ങൾ കെട്ടിക്കിടക്കുകയാണ്. ഇത് കർഷകർക്ക് വലിയ സാമ്പത്തിക നഷ്ടമുണ്ടാക്കി.

ചരക്ക് കൂലി വർദ്ധന: നിലവിൽ ഒമാനിലേക്ക് മാത്രമാണ് വിമാന സർവീസുകൾ ഉള്ളത്. എന്നാൽ വിമാനക്കമ്പനികൾ സാധാരണ നിരക്കിന്റെ മൂന്നിരട്ടിയിലധികം തുകയാണ് കാർഗോ ചാർജായി ഈടാക്കുന്നത്.

നാടൻ വിപണിയിലെ പ്രതിസന്ധി: കയറ്റുമതി ചെയ്യാൻ സാധിക്കാത്ത ഉൽപ്പന്നങ്ങൾ കുറഞ്ഞ വിലയ്ക്ക് പ്രാദേശിക വിപണിയിൽ വിറ്റഴിക്കേണ്ടി വരുന്നത് കർഷകരുടെ നട്ടെല്ലൊടിക്കുന്നു.

സംഘർഷം നീണ്ടുനിൽക്കുകയാണെങ്കിൽ കേരളത്തിലെ കാർഷിക-കയറ്റുമതി മേഖലകൾ തകർച്ചയിലേക്ക് നീങ്ങുമെന്ന ആശങ്കയിലാണ് ഈ രംഗത്തുള്ളവർ.