കുവൈറ്റിലെ ജലശുദ്ധീകരണ പ്ലാന്റിന് നേരെ ഇറാന്റെ ആക്രമണം; ഇന്ത്യൻ തൊഴിലാളി കൊല്ലപ്പെട്ടു

​കുവൈറ്റ് സിറ്റി: അമേരിക്കയും ഇറാനും തമ്മിലുള്ള സൈനിക നീക്കങ്ങൾ യുദ്ധത്തിലേക്ക് നീങ്ങുന്നതിനിടെ, കുവൈറ്റിലെ പ്രധാന പ്ലാന്റിന് നേരെ ഇറാന്റെ മിസൈൽ ആക്രമണം. ആക്രമണത്തിൽ പ്ലാന്റിലെ ജീവനക്കാരനായ ഇന്ത്യൻ സ്വദേശി കൊല്ലപ്പെട്ടതായി കുവൈറ്റ് ഔദ്യോഗികമായി സ്ഥിരീകരിച്ചു. തിങ്കളാഴ്ചയാണ് കുവൈറ്റിലെ വൈദ്യുതി-ജല ശുദ്ധീകരണ പ്ലാന്റിന് (Desalination Plant) നേരെ ആക്രമണമുണ്ടായത്.

കുവൈറ്റിലെ വൈദ്യുതി, ജല വിതരണ ശൃംഖലയുടെ നട്ടെല്ലായ പ്ലാന്റിനെ ലക്ഷ്യമിട്ടായിരുന്നു ആക്രമണം. പ്ലാന്റിലെ സർവീസ് കെട്ടിടത്തിന് കാര്യമായ നാശനഷ്ടങ്ങൾ സംഭവിച്ചിട്ടുണ്ട്. മേഖലയിലെ യുദ്ധസമാനമായ സാഹചര്യം പ്രവാസി തൊഴിലാളികളുടെ സുരക്ഷയെക്കുറിച്ചുള്ള വലിയ ആശങ്കകളാണ് ഉയർത്തുന്നത്.

​കുവൈറ്റ് ഊർജ്ജ മന്ത്രാലയത്തിന്റെ നീക്കം:

സംഭവസ്ഥലത്ത് ഉടൻ തന്നെ അടിയന്തര രക്ഷാസംഘത്തെ വിന്യസിച്ചതായി കുവൈറ്റ് ഊർജ്ജ മന്ത്രാലയം അറിയിച്ചു. പ്ലാന്റിന്റെ പ്രവർത്തനം തടസ്സമില്ലാതെ മുന്നോട്ട് കൊണ്ടുപോകുന്നതിനും നാശനഷ്ടങ്ങൾ വിലയിരുത്തുന്നതിനുമുള്ള പ്രവർത്തനങ്ങൾ പുരോഗമിക്കുകയാണ്. പ്ലാന്റിലെ തകരാറുകൾ പരിഹരിക്കാൻ യുദ്ധകാലാടിസ്ഥാനത്തിൽ നടപടികൾ സ്വീകരിച്ചു വരുന്നു.