ഇറാൻ-ഇസ്രായേൽ യുദ്ധം: ഇസ്രായേലിന് നേരെ ഇറാന്റെ പ്രത്യാക്രമണം

 

തെഹ്‌റാൻ/ടെൽ അവീവ്: പശ്ചിമേഷ്യയെ യുദ്ധഭീതിയിലാഴ്ത്തി ഇസ്രായേലിന് നേരെ ഇറാന്റെ വൻ പ്രത്യാക്രമണം. ശനിയാഴ്ച രാവിലെ ഇസ്രായേലും അമേരിക്കയും ചേർന്ന് ഇറാനിൽ നടത്തിയ സംയുക്ത വ്യോമാക്രമണത്തിന് മറുപടിയായാണ് ഇറാൻ ബാലിസ്റ്റിക് മിസൈലുകളും ഡ്രോണുകളും ഉപയോഗിച്ച് തിരിച്ചടി തുടങ്ങിയത്. ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) പ്രത്യാക്രമണം സ്ഥിരീകരിച്ചു.

ഇസ്രായേലിൽ അടിയന്തരാവസ്ഥ, സൈറണുകൾ മുഴങ്ങുന്നു

ഇറാൻ മിസൈലുകൾ തൊടുത്തുവിട്ടതിന് പിന്നാലെ ഇസ്രായേലിലുടനീളം അപായ സൈറണുകൾ മുഴങ്ങി. രാജ്യം പൂർണ്ണമായ അടിയന്തരാവസ്ഥയിലേക്ക് മാറുകയും വ്യോമപാതകൾ അടയ്ക്കുകയും ചെയ്തു. ജനങ്ങളോട് സുരക്ഷിത കേന്ദ്രങ്ങളിലേക്ക് മാറാൻ സൈന്യം നിർദ്ദേശം നൽകിയിട്ടുണ്ട്. ടെൽ അവീവ് ഉൾപ്പെടെയുള്ള പ്രധാന നഗരങ്ങളെ ലക്ഷ്യമിട്ടാണ് ഇറാന്റെ നീക്കമെന്നാണ് റിപ്പോർട്ടുകൾ.

സംയുക്ത ആക്രമണവും ട്രംപിന്റെ പ്രഖ്യാപനവും

നേരത്തെ, ഇറാന്റെ ആണവ-മിസൈൽ കേന്ദ്രങ്ങളെ ലക്ഷ്യമിട്ട് ഇസ്രായേലും അമേരിക്കയും 'പ്രതിരോധ ആക്രമണം' (Pre-emptive Strike) നടത്തിയിരുന്നു. തെഹ്‌റാനിലെ അതീവ സുരക്ഷാ മേഖലകളിലും പരമോന്നത നേതാവ് ആയത്തുള്ള അലി ഖമനയിയുടെ ഓഫീസിന് സമീപവും സ്ഫോടനങ്ങൾ നടന്നു. പിന്നാലെ, ഇറാനിൽ തങ്ങൾ 'വലിയ സൈനിക നടപടി' (Major Combat Operations) ആരംഭിച്ചതായി യുഎസ് പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. ഖമനയിയെ സുരക്ഷിത താവളത്തിലേക്ക് മാറ്റിയതായാണ് വിവരം.

ഇന്ത്യൻ പൗരന്മാർക്ക് ജാഗ്രതാ നിർദ്ദേശം

സംഘർഷം കടുത്തതോടെ ഇറാനിലും ഇസ്രായേലിലുമുള്ള ഇന്ത്യൻ പൗരന്മാർക്ക് ഇന്ത്യൻ എംബസി അതീവ ജാഗ്രതാ നിർദ്ദേശം നൽകി. അത്യാവശ്യത്തിനല്ലാതെ പുറത്തിറങ്ങരുതെന്നും സുരക്ഷിത സ്ഥാനങ്ങളിൽ തുടരണമെന്നുമാണ് നിർദ്ദേശം. എയർ ഇന്ത്യ ഉൾപ്പെടെയുള്ള വിമാന സർവീസുകൾ പലതും വഴിതിരിച്ചുവിടുകയോ റദ്ദാക്കുകയോ ചെയ്തിട്ടുണ്ട്