ചുരിദാർ ധരിച്ചെത്തി; പ്രധാനാധ്യാപികയെ സ്കൂൾ ഗേറ്റിൽ തടഞ്ഞു; കൊട്ടാരക്കരയിൽ പ്രതിഷേധം

 

കൊട്ടാരക്കര: വസ്ത്രധാരണത്തിന്റെ പേരിൽ പ്രധാനാധ്യാപികയെ സ്കൂൾ ഗേറ്റിൽ തടഞ്ഞതായി പരാതി. കൊട്ടാരക്കര നടുവത്തൂർ ഈശ്വരവിലാസം ഹയർ സെക്കൻഡറി സ്കൂളിലെ പ്രധാനാധ്യാപിക സിന്ധു എസ് നായർക്കാണ് ഈ ദുരനുഭവം ഉണ്ടായത്. ചുരിദാർ ധരിച്ച് സ്കൂളിലെത്തിയ അധ്യാപികയെ സെക്യൂരിറ്റി ജീവനക്കാരൻ തടയുകയും ഗേറ്റ് പൂട്ടുകയുമായിരുന്നു.

സംഭവത്തെക്കുറിച്ച് അധ്യാപിക പറയുന്നത്:

സ്കൂൾ മാനേജരുടെ നിർദ്ദേശപ്രകാരമാണ് തന്നെ തടഞ്ഞതെന്ന് അധ്യാപിക ആരോപിക്കുന്നു. മുൻപും ചുരിദാർ ധരിച്ചെത്തിയപ്പോൾ വസ്ത്രധാരണത്തെക്കുറിച്ച് മാനേജർ മോശമായി സംസാരിച്ചിട്ടുണ്ടെന്നും അവർ വ്യക്തമാക്കി. സ്കൂളിനുള്ളിൽ പ്രവേശിക്കാൻ അനുവദിക്കാത്തതിനെത്തുടർന്ന് അധ്യാപിക ഗേറ്റിന് മുന്നിലിരുന്ന് പ്രതിഷേധിച്ചു.

പോലീസ് ഇടപെടൽ

 കൊട്ടാരക്കര പോലീസ് സ്ഥലത്തെത്തുകയും ഗേറ്റ് തുറപ്പിച്ച് അധ്യാപികയെ സ്കൂളിനുള്ളിൽ പ്രവേശിപ്പിക്കുകയും ചെയ്തു. സർക്കാർ ഉത്തരവുകൾ നിലനിൽക്കെ അധ്യാപികയെ തടഞ്ഞ നടപടിക്കെതിരെ പ്രതിഷേധം ഉയരുന്നുണ്ട്.

നിയമം എന്ത് പറയുന്നു?

അധ്യാപികമാർക്ക് സ്കൂളുകളിൽ സാരിക്ക് പുറമെ ചുരിദാറോ മറ്റ് സൗകര്യപ്രദമായ വസ്ത്രങ്ങളോ ധരിക്കാമെന്ന് 2008 ഫെബ്രുവരിയിൽ തന്നെ സർക്കാർ ഉത്തരവ് പുറപ്പെടുവിച്ചിട്ടുണ്ട്. ഈ ഉത്തരവ് നിലനിൽക്കെയാണ് എയ്ഡഡ് സ്കൂൾ മാനേജ്മെന്റിന്റെ ഭാഗത്തുനിന്നും ഇത്തരമൊരു നടപടിയുണ്ടായത്