പതിറ്റാണ്ടിലേറെക്കാലം നീണ്ട പൊതുപ്രവർത്തനം : മലബാറിലെ ആദ്യത്തെ മുസ്ലിം വനിതാ എം.എൽ.എമാരിൽ ഒരാൾ

 

ജലീൽ പയ്യോളി

കൊയിലാണ്ടി: നിയോജകമണ്ഡലം എം.എൽ.എയും സി.പി.എം. നേതാവുമായ കാനത്തിൽ ജമീല എം എൽ എ യുടെ വിയോഗവാർത്ത എത്തിയത്  അപ്രതീക്ഷിതമായി.രോഗത്തോട് മല്ലിട്ട് ജീവിതത്തിലേക്ക് തിരിച്ചു കയറി വരുന്നതിനിടയിലാണ് അപ്രതീക്ഷിതമായി മരണം സംഭവിച്ചത്.മണ്ഡലത്തിലെ പ്രവർത്തനങ്ങളിലും പരിപാടികളിലും സജീവമാകാൻ കഴിയില്ലെന്ന് ബോധ്യപ്പെട്ടതോടെ വീഡിയോ ക്ലിപ്പിൽ തൻറെ പ്രയാസങ്ങൾ പറയുകയും നിങ്ങളോടൊപ്പം ഞാനുണ്ടെന്നും തൽക്കാലം ഉണ്ടാവില്ലെന്നും പറയുമ്പോൾ ഇത്രമേൽ പ്രതീക്ഷരുന്നില്ല. അതിനിടെ ആരോഗ്യം വീണ്ടെടുത്ത് വരുമ്പോൾ തന്നെ പൊതു പരിപാടികളിൽ ഓൺലൈനായി ഉദ്ഘാടനം നിർവഹിക്കുകയും ജനങ്ങളുമായി സംവദിക്കുകയും ചെയ്തിരുന്നു.

അർബുദരോഗബാധയെ തുടർന്ന് കോഴിക്കോട്ടെ സ്വകാര്യ ആശുപത്രിയിൽ ചികിത്സയിലിരിക്കെ ശനിയാഴ്ച രാത്രി 8:45-ഓടെയായിരുന്നു അന്ത്യം. മൂന്ന് പതിറ്റാണ്ടിലേറെക്കാലം നീണ്ട പൊതുപ്രവർത്തനത്തിലൂടെ മലബാറിലെ ജനകീയ നേതാവായി മാറി

കുടുംബശ്രീയിലൂടെയും സാക്ഷരതാ മിഷനിലൂടെയുമാണ് കാനത്തിൽ ജമീല പൊതുരംഗത്തേക്ക് കടന്നുവരുന്നത്. പ്രാദേശിക സ്വയംഭരണ സ്ഥാപനങ്ങളിൽ തുടങ്ങി നിയമസഭ വരെ നീണ്ടതായിരുന്നു അവരുടെ പൊതുജീവിതം.

ഗ്രാമപഞ്ചായത്ത് മുതൽ നിയമസഭവരെ

 1995-ൽ തലക്കുളത്തൂർ ഗ്രാമപഞ്ചായത്ത് പ്രസിഡന്റായാണ് അവർ തിരഞ്ഞെടുപ്പ് രാഷ്ട്രീയത്തിൽ സജീവമാകുന്നത്. തുടർന്ന് ചേളന്നൂർ ബ്ലോക്ക് പഞ്ചായത്ത് പ്രസിഡന്റായും (2005) കോഴിക്കോട് ജില്ലാ പഞ്ചായത്ത് പ്രസിഡന്റായും (2010, 2020) മികച്ച പ്രകടനം കാഴ്ചവെച്ചു. വൃക്കരോഗികൾക്കായി ജില്ലാ പഞ്ചായത്തിന്റെ നേതൃത്വത്തിൽ നടപ്പാക്കിയ 'സ്നേഹസ്പർശം' പദ്ധതി ഏറെ ശ്രദ്ധ നേടിയിരുന്നു.

 2021-ലെ നിയമസഭാ തിരഞ്ഞെടുപ്പിൽ കൊയിലാണ്ടി മണ്ഡലത്തിൽ നിന്ന് യു.ഡി.എഫ്. സ്ഥാനാർത്ഥി എൻ. സുബ്രഹ്മണ്യനെ 8,472 വോട്ടുകൾക്ക് പരാജയപ്പെടുത്തിയാണ് അവർ നിയമസഭയിലെത്തിയത്. മലബാറിലെ ആദ്യത്തെ മുസ്ലിം വനിതാ എം.എൽ.എമാരിൽ ഒരാളാണ് കാനത്തിൽ ജമീല.

രാഷ്ട്രീയ സാമൂഹിക മേഖലയിലെ സംഭാവനകൾ

സി.പി.എം. കോഴിക്കോട് ജില്ലാ കമ്മിറ്റി അംഗവും ജനാധിപത്യ മഹിളാ അസോസിയേഷൻ സംസ്ഥാന വൈസ് പ്രസിഡന്റുമായിരുന്നു അവർ. സ്ത്രീകളുടെ വിഷയങ്ങളിലും ജനകീയ പ്രശ്നങ്ങളിലും സജീവമായി ഇടപെട്ടിരുന്നു. ലാളിത്യവും വിനയവും നിറഞ്ഞ അവരുടെ സമീപനം കക്ഷിരാഷ്ട്രീയ ഭേദമന്യേ എല്ലാവരുടെയും അംഗീകാരം നേടി.

 അനുശോചനം

മുഖ്യമന്ത്രി പിണറായി വിജയൻ, സ്പീക്കർ എ.എൻ. ഷംസീർ, പ്രതിപക്ഷ നേതാവ് വി.ഡി. സതീശൻ ഉൾപ്പെടെ നിരവധി പ്രമുഖർ  നിര്യാണത്തിൽ അനുശോചനം രേഖപ്പെടുത്തി.

 ഭർത്താവ് കെ. അബ്ദുറഹ്മാൻ. മക്കൾ: ഐറീജ് റഹ്മാൻ (യു.എസ്.എ), അനൂജ സുഹൈബ്. മൃതദേഹം പൊതുദർശനത്തിനുശേഷം ചൊവ്വാഴ്ച അത്തോളി കുനിയിൽ ജുമാ മസ്ജിദിൽ കബറടക്കും.