സെക്രട്ടറിയേറ്റിന് മുന്നിലെ എൽ.പി.എസ്.ടി. ഉദ്യോഗാർത്ഥികളുടെ സമരം: പൊളിച്ചുനീക്കിയ പന്തൽ പുനഃസ്ഥാപിച്ചതിന് ഡിവൈഎഫ്ഐക്കും സമരസമിതിക്കുമെതിരെ കേസ്

തിരുവനന്തപുരം: റാങ്ക് പട്ടികയിൽനിന്ന് നിയമനം ആവശ്യപ്പെട്ട് ലോവർ പ്രൈമറി സ്കൂൾ ടീച്ചർ റാങ്ക് ഹോൾഡേഴ്സ് അസോസിയേഷന്റെ (എൽ.പി.എസ്.ടി) നേതൃത്വത്തിൽ സെക്രട്ടറിയേറ്റിന് മുന്നിൽ നടക്കുന്ന സമരത്തിൽ പോലീസ് പുതിയ കേസുകൾ രജിസ്റ്റർ ചെയ്തു. കഴിഞ്ഞ ദിവസം രാത്രി പോലീസ് പൊളിച്ചുനീക്കിയ സമരപ്പന്തലുകൾ മണിക്കൂറുകൾക്കുള്ളിൽ പുനഃസ്ഥാപിച്ചതിന് ഡിവൈഎഫ്ഐക്കും എൽ.പി.എസ്.ടി. സമരസമിതിക്കും എതിരെയാണ് പോലീസ് കേസെടുത്തത്. ഇതിന് പുറമെ പോലീസിന്റെ ഔദ്യോഗിക കൃത്യനിർവഹണം തടസ്സപ്പെടുത്തിയതിന് യുവമോർച്ച പ്രവർത്തകർക്കെതിരെയും മറ്റൊരു കേസ് രജിസ്റ്റർ ചെയ്തിട്ടുണ്ട്.

കഴിഞ്ഞ രാത്രിയോടെയാണ് പോലീസെത്തി സമരസമിതിയുടെ പന്തൽ ബലമായി പൊളിച്ചുനീക്കിയത്. തുടർന്ന് നിരാഹാര സമരം അനുഷ്ഠിച്ചിരുന്ന സമരസമിതി നേതാവ് വളർമതിയെ പോലീസ് അറസ്റ്റ് ചെയ്ത് ആശുപത്രിയിലേക്ക് മാറ്റി. വളർമതിയെ ആശുപത്രിയിലേക്ക് മാറ്റിയതിന് പിന്നാലെ ഉദ്യോഗാർത്ഥിയായ ജയകൃഷ്ണൻ നിരാഹാര സമരം ഏറ്റെടുത്തു. ബലപ്രയോഗത്തിലൂടെയാണ് സമരക്കാരെ മാറ്റാൻ ശ്രമിച്ചതെന്ന് ആരോപിച്ച ഉദ്യോഗാർത്ഥികൾ, ആവശ്യങ്ങൾ സർക്കാർ അംഗീകരിക്കാതെ സമരത്തിൽ നിന്ന് പിന്നോട്ടില്ലെന്ന നിലപാടിൽ ഉറച്ചുനിൽക്കുകയാണ്.

അതേസമയം, സുപ്രീംകോടതി വിധി പ്രകാരമാണ് നടപടിയെടുത്തതെന്ന് സിറ്റി പോലീസ് കമ്മീഷണർ അരുൺ ബി. കൃഷ്ണ വ്യക്തമാക്കി. പൊതുജനങ്ങളുടെ സഞ്ചാരസ്വാതന്ത്ര്യം തടസ്സപ്പെടുത്തി കെട്ടിയ സ്ഥിരം പന്തലാണ് നീക്കിയതെന്നും താൽക്കാലിക പന്തൽ പൊളിച്ചിട്ടില്ലെന്നും അദ്ദേഹം പറഞ്ഞു. കോടതി അലക്ഷ്യത്തിന് ഉദ്യോഗസ്ഥർക്കെതിരെ കേസുവന്ന സാഹചര്യത്തിലാണ് പലതവണ നോട്ടീസ് നൽകിയ ശേഷം പന്തൽ പൊളിച്ചതെന്നാണ് പോലീസിന്റെ വിശദീകരണം. സമരം 129-ാം ദിവസത്തിലേക്ക് കടന്നപ്പോഴായിരുന്നു പോലീസ് നടപടി. സർക്കാരിന്റെ നിർദ്ദേശമാണ് പോലീസ് നടപ്പാക്കുന്നതെന്നും അവരുടെ കൃത്യനിർവഹണത്തിൽ വിരോധമില്ലെന്നും ആവശ്യങ്ങൾ അംഗീകരിക്കും വരെ സമരം തുടരുമെന്നും വളർമതി പ്രതികരിച്ചു.