മുത്താമ്പിയിൽ എംഡിഎംഎയുമായി യുവാവ് പിടിയിൽ; ബൈക്ക് അപകടത്തിന് പിന്നാലെയുണ്ടായ തർക്കത്തിനിടെ നാട്ടുകാർ വലയിലാക്കി

കൊയിലാണ്ടി: മുത്താമ്പിയിൽ മാരക ലഹരിമരുന്നായ എം.ഡി.എം.എയുമായി (MDMA) യുവാവിനെ കൊയിലാണ്ടി പോലീസ് അറസ്റ്റ് ചെയ്തു. ഊരള്ളൂർ കുഴിച്ചാൽ മീത്തൽ സ്വദേശി ലിബിൻ ആണ് പോലീസ് പിടിയിലായത്. ഇയാളുടെ പക്കൽ നിന്ന് 1.40 ഗ്രാം എം.ഡി.എം.എ പോലീസ് സംഘം കണ്ടെടുത്തു.

ഇന്നലെ രാത്രിയാണ് നാടകീയമായ സംഭവങ്ങൾ അരങ്ങേറിയത്. ലിബിനും സുഹൃത്തുക്കളും സഞ്ചരിച്ച ബൈക്ക് ഒരു കാറിൽ തട്ടുകയും ഇതിനെച്ചൊല്ലി റോഡിൽ വെച്ച് തർക്കമുണ്ടാവുകയും ചെയ്തു. തർക്കത്തിനിടെ ലിബിന്റെ അസ്വാഭാവികമായ പെരുമാറ്റത്തിൽ സംശയം തോന്നിയ നാട്ടുകാർ ഉടൻ തന്നെ കൊയിലാണ്ടി പോലീസിൽ വിവരമറിയിക്കുകയായിരുന്നു.

പോലീസിനെ കണ്ട് കൂട്ടാളികൾ ഓടി രക്ഷപ്പെട്ടു

വിവരമറിഞ്ഞ് കൊയിലാണ്ടി പോലീസ് സംഘം സംഭവസ്ഥലത്തെത്തി പരിശോധന നടത്തിയപ്പോഴാണ് ലിബിന്റെ കൈവശം സൂക്ഷിച്ചിരുന്ന ലഹരിമരുന്ന് കണ്ടെത്തിയത്. എന്നാൽ, പോലീസ് വരുന്നത് കണ്ടതോടെ ഇയാളോടൊപ്പമുണ്ടായിരുന്ന മറ്റ് രണ്ട് യുവാക്കൾ ബൈക്ക് ഉപേക്ഷിച്ച് ഓടി രക്ഷപ്പെടുകയായിരുന്നു.

കൊയിലാണ്ടി എസ്.ഐ ശ്രീജേഷിന്റെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റ് ചെയ്തത്. സംഭവസ്ഥലത്തുനിന്ന് ഓടി രക്ഷപ്പെട്ട മറ്റ് രണ്ട് പ്രതികൾക്കായി പോലീസ് അന്വേഷണം ഊർജിതമാക്കിയിട്ടുണ്ട്