യുവതിയും ഒന്നര വയസ്സുകാരൻ മകനും കിണറ്റിൽ മരിച്ച നിലയിൽ .ആത്മഹത്യാക്കുറിപ്പ് കണ്ടെടുത്തു

  

​തിരൂർ: മലപ്പുറം ജില്ലയിലെ തിരൂർ ഏഴൂരിൽ യുവതിയെയും ഒന്നര വയസ്സുകാരനായ മകനെയും വീട്ടുപറമ്പിലെ കിണറ്റിൽ മരിച്ച നിലയിൽ കണ്ടെത്തി. ഏഴൂർ സ്വദേശി ഇർഫാന, മകൻ അമാൻ മാലിക് എന്നിവരാണ് മരിച്ചത്. തിങ്കളാഴ്ച വൈകിട്ടോടെയാണ് നാടിനെ നടുക്കിയ സംഭവം പുറംലോകമറിഞ്ഞത്.

​

വീട്ടുകാർ പുറത്തുപോയ സമയത്താണ് ഇർഫാന മകനുമായി കിണറ്റിൽ ചാടിയതെന്നാണ് സംശയിക്കുന്നത്. വിവരമറിഞ്ഞ് സ്ഥലത്തെത്തിയ ഫയർഫോഴ്സ് സംഘമാണ് ഇരുവരെയും പുറത്തെടുത്തത്. തുടർന്ന് തിരൂർ ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. നിലവിൽ മൃതദേഹങ്ങൾ ജില്ലാ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.

​

സംഭവസ്ഥലത്തുനിന്നും ഇർഫാന എഴുതിയ ആത്മഹത്യാക്കുറിപ്പ് പോലീസ് കണ്ടെടുത്തിട്ടുണ്ട്. നാല് മാസം മുൻപ് മാതാവ് മരിച്ചതിനെത്തുടർന്ന് ഇർഫാന കടുത്ത മാനസിക വിഷമത്തിലായിരുന്നുവെന്ന് പോലീസ് പ്രാഥമിക അന്വേഷണത്തിൽ വ്യക്തമായി. ഈ മനോവിഷമമാകാം ആത്മഹത്യയിലേക്ക് നയിച്ചതെന്നാണ് പോലീസിന്റെ നിഗമനം.

​മരണത്തിൽ കൂടുതൽ വ്യക്തത വരുത്തുന്നതിനായി പോലീസ് വിശദമായ അന്വേഷണം ആരംഭിച്ചു. പോസ്റ്റ്‌മോർട്ടം നടപടികൾ പൂർത്തിയാക്കിയ ശേഷം മൃതദേഹങ്ങൾ ബന്ധുക്കൾക്ക് വിട്ടുനൽകും