കേരള ചരിത്രത്തിൽ ആദ്യം; വിയ്യൂർ ജയിലിനുള്ളിൽ ജനപ്രതിനിധിയുടെ സത്യപ്രതിജ്ഞ, കാപ്പ തടവുകാരനായ ബിജെപി കൗൺസിലർ ആർ. സുഗതൻ ചുമതലയേറ്റു

തൃശ്ശൂർ: കേരളത്തിന്റെ ചരിത്രത്തിൽ ആദ്യമായി ഒരു ജനപ്രതിനിധി ജയിലിനുള്ളിൽ വെച്ച് ഔദ്യോഗികമായി സത്യപ്രതിജ്ഞ ചെയ്ത് ചുമതലയേറ്റു. കാപ്പ (KAAPA) നിയമപ്രകാരം കരുതൽ തടങ്കലിൽ കഴിയുന്ന തിരുവനന്തപുരം കോർപ്പറേഷനിലെ ബിജെപി കൗൺസിലർ ആർ. സുഗതനാണ് വിയ്യൂർ സെൻട്രൽ ജയിലിലെ ലൈബ്രറി ഹാളിൽ വെച്ച് സത്യപ്രതിജ്ഞ ചെയ്തത്. കോടതി ഉത്തരവിനെ തുടർന്ന് അതീവ സുരക്ഷയോടെ നടന്ന ചടങ്ങുകൾ അഞ്ച് മിനിറ്റോളം നീണ്ടുനിന്നു.

തിരുവനന്തപുരം മേയർ വി.വി. രാജേഷാണ് ജയിലിനുള്ളിലെത്തി സുഗതന് സത്യപ്രതിജ്ഞാ വാചകം ചൊല്ലിക്കൊടുത്തത്. തിരുവനന്തപുരം കോർപ്പറേഷനിലെ മറ്റ് കൗൺസിലർമാരും ചടങ്ങിൽ പങ്കെടുത്തു. സത്യപ്രതിജ്ഞാ ചടങ്ങുകൾക്ക് ശേഷം സുഗതനെ ഉദ്യോഗസ്ഥർ തിരികെ ജയിൽ സെല്ലിലേക്ക് മാറ്റി.

ദൈവനാമത്തിലുള്ള സത്യപ്രതിജ്ഞാ വിവാദം

നേരത്തെ തദ്ദേശ തിരഞ്ഞെടുപ്പിൽ വിജയിച്ച ശേഷം ദൈവനാമത്തിലും പ്രാദേശിക ദൈവങ്ങളുടെ പേര് വിവരങ്ങൾ ഉൾപ്പെടുത്തിയും സുഗതൻ ഉൾപ്പെടെയുള്ള 20 ബിജെപി കൗൺസിലർമാർ നടത്തിയ സത്യപ്രതിജ്ഞ ചട്ടവിരുദ്ധമാണെന്ന് ചൂണ്ടിക്കാട്ടി ഹൈക്കോടതി റദ്ദാക്കിയിരുന്നു. നാല് ആഴ്ചയ്ക്കുള്ളിൽ കൃത്യമായ ചട്ടപ്രകാരം വീണ്ടും സത്യപ്രതിജ്ഞ ചെയ്യാൻ കോടതി നിർദ്ദേശിക്കുകയും ചെയ്തു.

ഇതേത്തുടർന്ന് സുഗതനൊഴികെ ബാക്കി 19 കൗൺസിലർമാരും തിരുവനന്തപുരത്ത് വെച്ച് വീണ്ടും സത്യപ്രതിജ്ഞ ചെയ്ത് ചുമതലയേറ്റു. എന്നാൽ ഈ സമയത്തിനിടയിൽ കടുത്ത ക്രിമിനൽ കേസുകളെ തുടർന്ന് സുഗതൻ കാപ്പ നിയമപ്രകാരം അറസ്റ്റിലാവുകയും വിയ്യൂർ ജയിലിൽ അടയ്ക്കപ്പെടുകയുമായിരുന്നു. നിശ്ചിത സമയത്തിനുള്ളിൽ സത്യപ്രതിജ്ഞ ചെയ്തില്ലെങ്കിൽ കൗൺസിലർ സ്ഥാനം നഷ്ടപ്പെടുമെന്ന ഘട്ടത്തിലാണ് സുഗതൻ ഹൈക്കോടതിയെ സമീപിച്ചത്.

'ജനവിധി തള്ളിക്കളയാനാവില്ല'; അസാധാരണ നടപടിയുമായി ഹൈക്കോടതി

നേരത്തെ സത്യപ്രതിജ്ഞ ചടങ്ങിനായി സുഗതന് കോടതി ഇടക്കാല ജാമ്യം അനുവദിച്ചിരുന്നെങ്കിലും, സുഗതൻ കരുതൽ തടങ്കലിൽ ആയതിനാൽ പുറത്തുവിടാനാകില്ലെന്ന് സർക്കാർ അറിയിച്ചു. എന്നാൽ ജയിലിനുള്ളിൽ സത്യപ്രതിജ്ഞയ്ക്ക് ആവശ്യമായ സൌകര്യങ്ങൾ ഒരുക്കാൻ തയ്യാറാണെന്ന് ജയിൽ വകുപ്പ് അറിയിച്ചതോടെ ജാമ്യം റദ്ദാക്കി കോടതി ജയിലിനുള്ളിൽ ചടങ്ങ് നടത്താൻ അനുമതി നൽകുകയായിരുന്നു.

ക്രിമിനൽ കേസുകളും ആരോപണങ്ങളും നിലനിൽക്കുമ്പോഴും ജനങ്ങളാണ് സുഗതനെ തിരഞ്ഞെടുത്തതെന്നും അതിനാൽ ജനവിധി മാനിക്കപ്പെടണമെന്നും വിലയിരുത്തിയാണ് ജസ്റ്റിസ് പി.വി. കുഞ്ഞികൃഷ്ണൻ ഈ അസാധാരണ ഉത്തരവ് പുറപ്പെടുവിച്ചത്. അസാധാരണ സാഹചര്യങ്ങളിൽ ജനാധിപത്യ മൂല്യങ്ങൾ സംരക്ഷിക്കാൻ കോടതിക്ക് അസാധാരണ തീരുമാനങ്ങൾ എടുക്കേണ്ടി വരുമെന്ന് ഹൈക്കോടതി നിരീക്ഷിച്ചു. മാത്രമല്ല, സുഗതന് സത്യപ്രതിജ്ഞ ചെയ്യാൻ സാധിക്കാതെ വന്നാൽ തിരുവനന്തപുരം കോർപ്പറേഷനിലെ ഭരണപരമായ ഭൂരിപക്ഷ സമവാക്യങ്ങളെ അത് ബാധിച്ചേക്കാമെന്ന വാദവും കോടതി കണക്കിലെടുത്തു. വിയ്യൂർ ജയിൽ സൂപ്രണ്ടിന്റെ മേൽനോട്ടത്തിലാണ് ചടങ്ങുകൾ പൂർത്തിയായത്.