മേപ്പയൂരിൽ വീടിന് തീപിടിച്ചു; വൻ ദുരന്തം ഒഴിവായത് തലനാരിഴയ്ക്ക്

​മേപ്പയ്യൂർ: മേപ്പയൂർ ടൗണിന് സമീപം വീടിന് തീപിടിച്ചു. കീഴ്പ്പയ്യൂർ റോഡിൽ പ്രവർത്തിക്കുന്ന തയ്യിൽ അഷ്‌റഫിന്റെ വീടിനാണ്  തീപിടിച്ചത്. വ്യാഴാഴ്ച ഉച്ചയ്ക്ക് 1.30-ഓടെയായിരുന്നു സംഭവം അപകടസമയത്ത് കുടുംബാംഗങ്ങൾ വീടിനുള്ളിൽ ഉണ്ടായിരുന്നെങ്കിലും, ഇവർ സമയോചിതമായി സുരക്ഷിതമായി പുറത്തിറങ്ങിയതിനാൽ വലിയൊരു ദുരന്തം തലനാരിഴയ്ക്ക് ഒഴിവാകുകയായിരുന്നു.

​രണ്ടു മണിക്കൂർ നീണ്ട രക്ഷാപ്രവർത്തനം

​വീട്ടിൽ നിന്ന് പുക ഉയരുന്നത് കണ്ട് നാട്ടുകാർ ഉടൻ തന്നെ പേരാമ്പ്ര ഫയർ ആൻഡ് റെസ്‌ക്യൂ ഫോഴ്‌സിനെ വിവരമറിയിക്കുകയായിരുന്നു. പേരാമ്പ്രയിൽ നിന്ന് സ്റ്റേഷൻ ഓഫീസർ ബി. കെ. ഭരതന്റെ നേതൃത്വത്തിൽ രണ്ട് യൂണിറ്റ് അഗ്നിശമന സേന ഉടൻ തന്നെ സ്ഥലത്തെത്തി രക്ഷാപ്രവർത്തനം ആരംഭിച്ചു. ഫയർഫോഴ്‌സും പ്രദേശവാസികളും ചേർന്ന് നടത്തിയ ഏകദേശം രണ്ട് മണിക്കൂർ നീണ്ട കഠിന ശ്രമത്തിനൊടുവിലാണ് തീ പൂർണ്ണമായും അണയ്ക്കാൻ സാധിച്ചത്.

​തീപിടിത്തത്തിന്റെ കാരണം വ്യക്തമല്ല. സംഭവത്തിൽ ലക്ഷക്കണക്കിന് രൂപയുടെ നാശനഷ്ടം സംഭവിച്ചതായാണ് പ്രാഥമിക നിഗമനം. അപകട കാരണം കണ്ടെത്താൻ അധികൃതർ പരിശോധിച്ച് വരികയാണ്.